पुणे - महापालिका कर्मचाऱ्यांची दिवाळी गोड करण्यासाठी प्रशासनाने आच अचानक कर्मचाऱ्यांच्या बँक खात्यात थेच १० हजार रुपयांची उचल जमा करण्यात आली आहे. दरम्यान कर्मचाऱ्यांना दिवाळीचे सानुग्रह अनुदनाबाबत अद्याप निर्णय झालेला नाही.

दिवाळी अवघ्या काही दिवसांवर येऊन ठेपलेली असताना महापालिका कर्मचारी, अधिकाऱ्यांना दरवर्षी १० हजार रुपये आगाऊ उचल दिली जाते. त्यामुळे दिवाळीसाठीची खरेदी करता येते. तसेच दरवर्षी कर्मचाऱ्यांना सानुग्रह अनुदान दिले जाते. हे अनुदान मिळावे यासाठी नगरसेवकही अधिकाऱ्यांना भेटून मागणी करतात, स्थायी समितीमध्येही याबाबत चर्चा करून प्रशासनाला आदेश दिले जातात. गेल्या अनेक वर्षापासून किमान १५ दिवस आधी दिवाळी सानुग्रह अनुदान बँक खात्यात जमा केले जाते. पण यंदा महापालिकेवर प्रशासक असल्याने याची चर्चा झाली नाही.

प्रशासनाकडूनही सानुग्रह अनुदान देण्यासाठीचे परिपत्रक अद्याप काढलेले नाही. पण आज संध्याकाळी १० हजार रुपयांची उचल देण्यात आली. दरम्यान, सानुग्रह अनुदानासाठीचा प्रस्ताव लेखा विभागाने तयार करून आयुक्त कार्यालयात पाठवला आहे, पण आयुक्तांची गुरुवार सायंकाळपर्यंत स्वाक्षरी झालेली नाही. याचा निर्णय उद्या न झाल्यास त्यानंतर सोमवार पर्यंत वाट पहावी लागणार आहे. त्यामुळे आज गुरुवारी कर्मचारी संघटनांनी देखील आयुक्तांची भेट घेऊन सानुग्रह अनुदानाची मागणी केली.