पुणे : शहरातील सर्व बोर्डाच्या शाळा आज सुरू राहणार आहेत, असे पुणे महापालिकेने स्पष्ट केले आहे. दरम्यान, शहरातील अनेक शाळांनी शाळा थेट सोमवारी उघडतील असे मेसेज पालकांना पाठवून दिले आहेत. पुणे शहर व परिसरात अतिवृष्टी होणार असल्याने आज (ता. १४) शाळेला सुट्टी देण्यात आली. आज दिवसभरात शहर व परिसरात साधारण पाऊस झाला, त्यामुळे पुणे महापालिकेने शुक्रवारी शाळा सुरू राहतील असे आदेश काढले आहेत. अतिरिक्त आयुक्त विलास कानडे म्हणाले, अतिवृष्टीमुळे शाळांना केवळ आजच्या दिवसपुरतीच सुट्टी होती. शुक्रवारी पुणे शहरातील सर्व बोर्डाच्या शाळा सुरू राहतील, त्यांना सुट्टी देण्यात आलेली नाही.’’

शाळा बंदचे पालकांना मेसेज

पुणे महापालिकेकडून शुक्रवारी शाळा सुरू राहणार की बंद ठेवणार याचा निर्णय लवकर होणे अपेक्षीत होते. मात्र, शाळा सुरू राहतील हे कळविण्यास सायंकाळ झाली. पण शहरातील बहुतांश शाळांनी दुपारीच पालकांना पालकांना शुक्रवारी शाळेला सुट्टी आहे असे मेसेज टाकून दिले. त्यामुळे उद्या पालिकेच्या स्वतःच्या शाळा वगळता इतर शाळा बंदच राहणार अशी असण्याची शक्यता आहे.

उद्या सर्व शाळा भरवा असा आदेश काढला गेला आहे कारण म्हणे आज पाऊस झा.ला नाही! पुणे जिल्हा परिषद, पुणे मनपा शिक्षण मंडळ,जिल्हाधिकारी कार्यालय काहीही मेळ नाही. तिघांचे दोन दिवसात तीन चार आदेश आहेत.

- एका शिक्षकांची प्रतिक्रिया