पुणे : शहरातील 24 कोविड क्वारंटाईन सेंटरमध्ये महिला रुग्णांच्या सुरक्षिततेसाठी अहोरात्र कार्यरत असेल, अशी हेल्पलाईन महापालिका दोन दिवसांत सुरू करणार असल्याची माहिती महापालिकेचे अतिरिक्त आयुक्त शंतनु गोयल यांनी दिली. तसेच सर्व सेंटर्समध्ये सीसीटीव्ही कॅमेरे लावण्यात येणार असून महिला सुरक्षारक्षकही तैनात करण्यात येणार असल्याचेही त्यांनी स्पष्ट केले.
 
ताज्या बातम्यांसाठी डाऊनलोड करा ई-सकाळचे ऍप   

महापालिकेने ताब्यात घेतलेल्या सिंहगड कॉलेजच्या कोविड क्वारंटाईन सेंटरमध्ये वॉर्डबॉयकडून महिला रुग्णाची मध्यरात्री छेडछाड झाल्याची घटना नुकतीच उघडकीस आली आहे. अशाच प्रकारच्या तीन घटना पुणे शहराच्या विविध भागांत नुकत्याच झाल्या होत्या. त्यातील एका घटनेत गुन्हा दाखल झाला असून संबंधित आरोपीला पोलिसांनी अटकही केली आहे. या पार्श्वभूमीवर कोविड क्वारंटाईन सेंटरमध्ये महिलांच्या सुरक्षिततेसाठी विविध उपाययोजना करण्यात येत असल्याची माहिती अतिरिक्त आयुक्त गोयल यांनी भारतीय जनता पक्षाच्या महिला मोर्चाच्या कोथरूड अध्यक्षा हर्षदा फरांदे तसेच सुवर्णा काकडे आणि जयश्री तलेसरा यांच्या नेतृत्त्वाखालील शिष्टमंडळाला दिले.  

कोविड क्वारंटाईन सेंटर्समध्ये महिला रुग्णांना काही विकृत मानसिकतेचे पुरुष घटक लक्ष्य करीत असल्याच्या घटना घडत आहेत. त्यामुळे महिला रुग्णांमध्ये असुरक्षिततेची भावना पसरली आहे. त्यातून त्यांच्या शारिरीक व मानसिक आरोग्यावरही प्रतिकूल परिणाम होत असल्याचे फरांदे यांनी गोयल यांच्या निदर्शनास आणून दिले. तसेच या बाबत सीसीटीव्ही, हेल्पलाईन, महिला सुरक्षारक्षक आदींची उपाययोजना करण्यात याव्यात, अशी मागणी केली. 

पुण्याच्या बातम्या वाचण्यासाठी येथे ► क्लिक करा

या वेळी गोयल यांनी महापालिकेकडून करण्यात येत असलेल्या विविध उपाययोजनांची माहिती दिली. त्यात पुण्यातील सर्व कोविड क्वारंटाईन सेंटर्समध्ये महिलांच्या सुरक्षिततेसाठी दोन दिवसांत हेल्पलाईन सुरू होत आहे. तो क्रमांक सर्व कोविड सेंटर्समध्ये दर्शनी भागात लावण्यात येईल. सर्वच सेंटर्समध्ये महिला रुग्णांची संख्या लक्षात घेऊन त्या प्रमाणात महिला सुरक्षारक्षक नियुक्त करण्यात येईल. तसेच त्या-त्या ठिकाणी सीसीटीव्ही कॅमेरे लावण्यात येतील. मध्यवर्ती आणि संबंधित रुग्णालयाच्या नियंत्रण कक्षातून तेथील घडामोडींवर लक्ष ठेवण्यात येईल. अनुचित घटना घडल्यास तत्काळ पोलिसांच्या मदतीने कारवाई करण्यात येईल, याची ग्वाहीही गोयल यांनी दिली. महिलांच्या सुरक्षिततेबाबत महापालिका प्रशासन सजग असून तत्पर असल्याचीह ग्वाहीही त्यांनी दिली. 

दरम्यान, त्या कोविड क्वारंटाईन सेंटरमध्ये अशी घटना पुन्हा घडू नये म्हणून महिलांसाठी स्वतंत्र वॉर्ड करण्यात येत आहे. तसेच महिला सुरक्षारक्षकही नियुक्त करण्यात येत असल्याची माहिती महापालिकेचे सहायक आयुक्त संभाजी खोत यांनी दिली. 

पुण्यातील विद्यार्थ्यांनी ठोठावला सर्वोच्च न्यायालयाचा दरवाजा; परीक्षा रद्द होणार?

पुणे शहरात गुरुवारी (ता. 24) कोरोनाचे 892 , पिंपरी चिंचवडमध्ये 811 आणि जिल्ह्यात 255 नवे रुग्ण आढळले आहेत. त्यामुळे पुणे जिल्ह्यातील रुग्णांची संख्या आता 64 हजारपेक्षा जास्त झाली आहे. तर, आत्तापर्यंत 1615 मृत्यू झाले आहेत. पुणे शहरात गुरुवारी 33, पिंपरी चिंचवडमध्ये 11 आणि जिल्ह्यात 9 मृत्यू झाले आहेत.