उंड्री : दिवाळीच्या सुटीनंतर सोमवार (दि. 30 ऑक्टोबर)पासून शाळा सुरू झाल्या. मात्र, पीएमपी बस बंद असल्याने विद्यार्थ्यांना पायपीट करावी लागत आहे. काळेबोराटेनगर (रेल्वे गेट क्र.8) शरीद फराटे चौक संकेत विहार दरम्यानची बंद केलेली बस शालेय विद्यार्थ्यांसाठी सुरू करावी, अशी मागणी पालकांनी केली आहे.

मागिल आठवड्यामध्ये परतीच्या पावसाने उपनगर आणि लगतच्या गावातील रस्त्याची दयनीय अवस्था झाली आहे. त्यामुळे पीएमपी प्रशासनाने काळेबोराटेनगर रेल्वे गेट क्र.8 ते संकेत विहार दरम्यानची बससेवा बंद केली आहे. दिवाळीच्या सुटीनंतर आता परिसरातील विद्यार्थ्यांना हडपसर गाव आणि परिसरातील शाळांमध्ये ये-जा करावी लागत आहे. खड्डेमय रस्त्यातून वाहनचालकांसह पादचाऱ्यांनाही कसरत करावी लागत आहे, असे वैशाली वरुडे, छाया दांगट, सोपान घोगरे यांनी सांगितले.काळेबोराटेनगर रेल्वेगेट क्र.8 ते संकेतविहार दरम्यानचा रस्ता उखडला असून, मोठे खड्डे पडले आहेत. त्यामुळे पीएमपी प्रशासनाने बससेवा बंद केलेली बससेवा पूर्ववत करावी.

प्रा. बापूसाहेब शिंदे, काळेबोराटेनगर

दरम्यान, पीएमपीएमएलचे हडपसर आगारप्रमुख नारायण करडे म्हणाले की, पीएमपी प्रशासन विद्यार्थ्यांची वा प्रवाशांची कोणतीही गैरसोय होणार नाही, याची दक्षता घेत आहे. पीएमपी बससेवा लवकरच पूर्ववत केली जाईल, असे त्यांनी सांगितले.