पुणे - अर्धवट बांधकाम झालेल्या इमारतींची नेमकी माहिती महापालिकेच्या प्रशासनाकडे नसल्याचे उघड झाले आहे. अशा इमारती, प्रकल्प शोधून त्याचा अहवाल भवन विभाग तयार करणार आहे. ८० टक्के काम पूर्ण असलेल्या बांधकामांना निधी उपलब्ध करून त्या इमारती वापरात आणण्यात येणार आहेत.

पालिकेच्या ४० हजार कोटींपेक्षा जास्त मालमत्ता

पुणे शहरात महापालिकेच्या मालकीची समाज मंदिरे, शाळा, नाट्यगृहे, क्रीडांगणे, दवाखाने, रुग्णालये, बहुउद्देशीय केंद्रे, क्षेत्रीय कार्यालये, इतर प्रशासकीय इमारती, मोकळ्या जागा, मैदाने, ॲमिनिटी स्पेस अशी मालमत्ता आहे. त्यांचे मूल्यांकन ४० हजार कोटी रूपयांपेक्षा जास्त आहे.

बांधकामासाठी भवन विभागाकडून निधी उपलब्ध करून देणे, निविदा प्रक्रिया करणे हे काम केले जाते. तर विद्युतविषयक कामे विद्युत विभागाकडून केली जातात. अंदाजपत्रकात भवन विभागासाठी किमान ४०० कोटी, तर विद्युत विभागाला ३० कोटी रुपयांपर्यंत तरतूद उपलब्ध असते.

निधीअभावी रखडली कामे

गेल्या काही वर्षांत नगरसेवकांनी त्यांच्या प्रभागात समाज मंदिर, शाळा, दवाखाना, आरोग्य कोठी, रुग्णालये, क्रीडांगण, जलतरण तलाव बांधण्यासाठी प्रशासनाकडून प्रस्ताव तयार करून घेतले. निधीअभावी ही कामे रखडली आहेत. महापालिकेत दीड वर्षापासून प्रशासक आहे.

रंगकाम, खिडक्या, दरवाजे बसविणे, विद्युत व्यवस्था, एखाद्या खोलीचे काम अपूर्ण असणे, अर्धवट कामे असलेल्या इमारतींची संख्या किती, याचा आकडा भवन व विद्युत विभागाकडे नाही. या कामांनाही निधीची गरज आहे.

असे एकूण किती प्रकल्प आहेत, त्यांचे आतापर्यंत झालेले काम व आवश्यक निधीचा अहवाल भवन विभागाने मागितला आहे. ज्यांची कामे ८० टक्क्यांपेक्षा जास्त पूर्ण आहेत अशा प्रकल्पांची रखडलेली किरकोळ कामे प्राधान्याने मार्गी लावून इमारतींचा वापर सुरू केला जाईल.

- विकास ढाकणे, अतिरिक्त आयुक्त, महापालिका