पुणे - महापालिकेने (Pune Municipal Corporation) मिळकतकराची (Property Tax) थकबाकी (Arrears) वसूल (Recovery) करण्यासाठी २०२०-२१ मध्ये अभय योजना (Abhay Yojana) राबविली होती. याचा दीड लाख थकबाकीदारांनी लाभ घेतला. मात्र त्यापैकी ४५ हजार ७४५ जणांनी २०२१-२२ मध्ये पुन्हा तब्बल १५१ कोटी रुपयांची थकबाकी निर्माण केली आहे. त्यामुळे वारंवार कर बुडविणाऱ्या मिळतकधारकांना अभय योजनेत दिलेली दंडमाफीची सवलत रद्द करा, अशी मागणी सजग नागरिक मंचाने केली आहे.

या योजनेत १ लाख ४९ हजार ७०० थकबाकीदारांनी सुमारे साडेचारशे कोटींचा कर भरला होता. आता या सर्व मालमत्ताधारकांनी गेल्या वर्षी २०२१-२२ वेळेवर मालमत्ता कर भरला आहे का, याची माहिती घेतली असता धक्कादायक वास्तव समोर आले आहे.

• १,१९,२७२ - निवासी मिळकतधारकांनी लाभ घेतला होता

• ३६,२२९ - त्यातील नागरिकांनी पुन्हा २०२१-२२ मध्ये ४० कोटींची थकबाकी निर्माण केली

• २३,३२ - बिगरनिवासी मिळकतधारकांनी अभय योजनेत सहभाग घेतला

• ७,१५४ - त्यापैकी २०२१-२२ मध्ये ९७ कोटींची थकबाकी केली

• ३ हजार १४८ - मोकळ्या जागांसाठी अभय योजनेचा लाभ घेतला

• ९४५ - त्यापैकी पुन्हा ७ कोटी रुपये थकविले आहेत

• ४,२५६ - मिश्र वापर असलेल्या मिळकतधारकांनी अभय योजनेचा फायदा घेतला

• १,४१८ - त्यापैकी जणांनी सात कोटी रुपये थकविले

अभय योजना म्हणजे प्रामाणिकपणे कर भरणाऱ्यांवर अन्याय आहे. या योजनेचा फायदा घेऊन ज्यांनी पुन्हा कर थकविला आहे, त्यांना दिलेली ७५ टक्क्यांची सवलत रद्द करा व ही रक्कम वसूल करा. तसेच भविष्यात अभय योजनेचा फायदा त्यांना पुन्हा दिला जाऊ नये.

- विवेक वेलणकर, अध्यक्ष, सजग नागरिक मंच