पुणे : पुणेकरांच्या जीवनावर थेट परिणाम करणारा पुणे महापालिकेचा २०२४-२५ चा अर्थसंकल्प उद्या (ता. ७) महापालिका आयुक्त विक्रम कुमार हे स्थायी समितीला सादर करणार आहेत. या अर्थसंकल्पातून पुणेकरांना काय मिळणार, याकडे लक्ष लागलेले आहे.

महापालिकेवर प्रशासकराज आल्यापासून विक्रम कुमार हे यंदा तिसऱ्यांदा अर्थसंकल्प मांडणार आहेत. गेल्या वर्षी ९ हजार ५९२ कोटींचा अर्थसंकल्प सादर केलेला होता. यंदा महापालिकेचा अर्थसंकल्प दहा हजार कोटींचा टप्पा ओलांडण्याची शक्यता आहे.

महापालिकेच्या सर्वसाधारण सभेच्या ठरावानुसार आयुक्तांनी १५ जानेवारीपर्यंत स्थायी समितीसमोर अर्थसंकल्प मांडणे आवश्यक आहे. मात्र गेल्या दोन वर्षांपासून महापालिकेवर प्रशासक असल्याने अर्थसंकल्पाबाबत स्थायी समिती आणि मुख्य सभेत निर्णय होत नाही. त्यामुळे या ठरावाला बगल देत मार्च महिन्यातच अर्थसंकल्प मांडण्यावर आयुक्तांनी भर दिलेला आहे.

दरम्यान, लोकसभा निवडणुकीची आचारसंहिता काही दिवसांत लागणार असताना समाविष्ट झालेल्या गावांमधील पायाभूत सुविधा, उड्डाणपूल, समतल विलगक, सांडपाणी व्यवस्थापन प्रकल्प, नदी सुधार या प्रकल्पांसह पुणेकरांसाठी कोणत्या योजना आयुक्त आणणार आहेत? त्यासाठी किती निधी असणार आहे? याकडे लक्ष लागले आहे.