पुणे - शहरात पाणीकपात लागू करताच महापालिकेने पाणीबचतीच्या उपायांकडे लक्ष देण्यास सुरवात केली असून, व्यावसायिक कारणांसाठी पिण्याच्या पाण्याचा वापर करणाऱ्यांविरोधात दंडात्मक कारवाई करण्याचा निर्णय आता महापालिकेने घेतला आहे. 

महापालिकेकडून आता बांधकामे, जलतरण तलाव, वॉशिंग सेंटर, उद्याने अन्य व्यावसायिक ठिकाणांची पाहणी करण्यात येणार आहे. या ठिकाणी पिण्याच्या पाण्याचा वापर होतो की नाही, हे तपासण्यात येणार आहे. त्याकरिता विशेष पथके नेमली जाणार आहेत. याशिवाय नागरिकांकडून आलेल्या तक्रारींची खातरजमा करून कारवाई करण्यात येईल, असे महापालिकेच्या पाणीपुरवठा विभागाने कळविले आहे. शहराच्या पाणीसाठ्यात कपात झाल्याने गेल्या दोन दिवसांपासून रोज एकवेळ पाणीपुरवठा करण्यात येत आहे. त्यात सर्व भागातील रहिवाशांना समान आणि पुरेसे पाणी मिळावे, यासाठी सर्वत्र सलग पाच तास पाणी सोडण्यात येत आहे. 

पाणीबचतीच्या उपाययोजनांची प्रभावी अंमलबजावणी केली जाणार असल्याचे महापालिका आयुक्त सौरभ राव यांनी गेल्या आठवड्यात स्पष्ट केले होते. त्यानुसार पाणीपुरवठा विभागाने कार्यवाही केली आहे. याबाबत संबंधित क्षेत्रीय अधिकाऱ्यांना सूचना दिलेल्या आहेत.