कात्रज - राज्याचे उपमुख्यमंत्री अजित पवार यांचे भला मोठा पुष्पहार आणि जेसीबीने फुलांची उधळण करत मोठ्या जयघोषात कात्रज-आंबेगाव परिसरात जंगी स्वागत करण्यात आले. पुणे जिल्हा सहकारी दूध उत्पादक संघाच्या (कात्रज डेअरी)

वतीने राजीव गांधी प्राणी संग्रहालयाजवळ ढोल ताशांच्या गजरात जल्लोषात स्वागत करुन विठ्ठल रुक्मिणीची प्रतिमा व पुष्पहार देऊन संघाचे अध्यक्ष भगवान पासलकर यांच्याकडून सत्कार करण्यात आला. यावेळी संचालक दिलीप थोपटे अरुण चांभारे, कालिदास गोपालघरे, स्वप्निल ढमढेरे, निखिल तांबे सो, चंद्रकांत भिंगारे यांच्यासह संघाचे सर्व कर्मचारी वृंद उपस्थित होते.

कात्रज चौकात जंगी स्वागत

माजी नगरसेवक प्रकाश कदम, हाजी गफूर पठाण, प्रतिक कदम यांच्या वतीने कात्रज चौक तर आंबेगाव येथे दत्तनगर चौकाजवळ माजी नगरसेवक युवराज बेलदरे यांनी ढोल ताशा पथक, फटाक्यांची आतषबाजी व जेसीबीच्या साहाय्याने फुलांची उधळण करत पवार यांचे स्वागत केले.

यावेळी अजित पवार यांच्या स्वागताला कात्रज परिसरातील युवक-युवती नागरिक, महिला मोठ्या संख्येने सहभागी झाले होते. भारती विद्यापीठ पोलीस स्टेशन व भारती विद्यापीठ वाहतूक विभागाच्या वतीने चोख बंदोबस्त ठेवण्यात आला होता.