पुणे - राज्य सरकारने मेट्रोच्या धर्तीवर महाराष्ट्र गृहनिर्माण व क्षेत्रविकास प्राधिकरणास (म्हाडा) स्वायतत्ता द्यावी, असा सूर पुणे जिल्हा सहकारी गृहनिर्माण संस्था महासंघाच्या वतीने शुक्रवारी (ता.२७) येथे आयोजित करण्यात आलेल्या एका चर्चासत्रात उमटला.पुणे जिल्हा सहकारी गृहनिर्माण संस्था आणि अपार्टमेंट्स महासंघाच्या वतीने संस्थेच्या सुवर्ण महोत्सवानिमित्त गृहनिर्माण सोसायट्यांच्या समस्या, प्रश्‍न व त्यांचे निराकरण करण्यासाठी नागरिकांना खुले व्यासपीठ उपलब्ध करून देण्याच्या उद्देशाने सोसायट्यांसाठी उपयुक्त ठरू शकणाऱ्या तीन दिवसीय प्रदर्शन व चर्चासत्रांचे आयोजन करण्यात आले आहे.

या प्रदर्शनाच्या पहिल्या दिवशी दुपारच्या सत्रात `म्हाडा’द्वारा निर्मित इमारतींचे पुनर्विकसन या विषयावर एका चर्चासत्राचे आयोजन करण्यात आले होते. या चर्चासत्रात हा सूर उमटला. यामध्ये पुणे महापालिकेचे माजी उपमहापौर डॉ. सिध्दार्थ धेंडे, स्थायी समितीचे माजी सभापती ॲड. नीलेश निकम, ‘म्हाडा’चे वरिष्ठ अधिकारी अशोक पाटील, वास्तू रचनाकार अक्षय राऊत, पुणे जिल्हा सहकारी गृहनिर्माण संस्था महासंघाचे अध्यक्ष सुहास पटवर्धन, समन्वयक सुनील जोशी आदी सहभागी झाले होते.

या प्रदर्शनात केंद्र सरकारच्या या उपक्रमाबाबत नागरिकांना माहिती दिली जात आहे. स्वारगेट परिसरातील गणेश कला क्रीडा मंच येथे हे प्रदर्शन भरविण्यात आले आहे. यावेळी डॉ. धेंडे म्हणाले,‘‘म्हाडाला स्वायत्तता दिल्याशिवाय ‘म्हाडा’च्या गाळे धारकांच्या समस्या सुटणार नाहीत. शिवाय या समस्या सोडविण्यासाठी पुणे जिल्हा सहकारी गृह निर्माण महासंघाने पुढाकार घेऊन, याबाबतचा प्रस्ताव सरकारकडे ठेवावा.’’ नियमावली, कायदे हे काळानुरूप बदलाशी सुसंगत असे राहिले पाहिजेत. त्यासाठी नागरिकांमध्ये जनजागृती होणे गरजेचे असल्याचे ॲड. नीलेश निकम यांनी सांगितले.

यावेळी माजी महापालिका आयुक्त महेश झगडे यांचेही भाषण झाले. त्यांनी प्रत्येक शहरात ‘वॉक टू वर्क’ ही संकल्पना जोपासायला हवी,असे सांगितले. या तीन दिवसीय प्रदर्शनाचे उद्घाटन आज सकाळी खासदार वंदना चव्हाण यांच्या हस्ते झाले. यावेळी माजी महापालिका आयुक्त महेश झगडे, सेवानिवृत्त नगर रचनाकार रामचंद्र गोहाड, वनराईचे अध्यक्ष रवींद्र धारिया,अभय छाजेड, श्यामला देसाई, लोकायुक्त दिलीप शिंदे, प्रांजली देशपांडे, मलय देशमुख आदी उपस्थित होते.महासंघाचे अध्यक्ष सुहास पटवर्धन यांनी स्वागत केले. समन्वयक सुनील जोशी यांनी प्रास्ताविक केले. उद्घाटन सत्राचे सूत्रसंचालन पुढारीचे संपादक सुनील माळी यांनी केले. दुपारच्या चर्चासत्राचे सूत्रसंचालन महाराष्ट्र टाईम्सचे मुख्य बातमीदार सुनीत भावे यांनी केले.