बारामती - राजकीय भूमिका वेगळी व कौटुंबिक नाते वेगळे, त्या मुळे दिवाळीत बारामतीतील गोविंदबागेत पवार कुटुंबिय एकत्रच दिवाळीचा सण साजरा करतील, अशी माहिती खासदार सुप्रिया सुळे यांनी माध्यमांशी बोलताना दिली. बारामतीतील माळावरच्या देवीच्या दर्शनाला सुप्रिया सुळे आल्या होत्या, तेव्हा माध्यमांशी बोलताना त्यांनी यंदाची दिवाळी पवार कुटुंबिय एकत्रच साजरी करणार असल्याचे नमूद केले.

अजित पवार यांनी भाजपसोबत जात सरकारमध्ये सहभागी झाल्यानंतर यंदा दिवाळीत सर्व पवार कुटुंबिय एकाच ठिकाणी येत राज्यातील कार्यकर्ते व नागरिकांच्या शुभेच्छा स्विकारणार या बाबत बारामतीकरांमध्ये उत्सुकता होती. या बाबत सुळे यांना विचारले असता त्यांनी एकत्रच दिवाळी साजरी करणार असल्याचे सांगितले.

विद्या प्रतिष्ठानच्या भिगवण शाळेच्या उदघाटन प्रसंगी ज्येष्ठ नेते शरद पवार, अजित पवार व तुम्ही एकत्र असणार का, या प्रश्नावर बोलताना त्यांनी पुन्हा एकदा राष्ट्रवादीत फूट नसल्याचेच नमूद केले. काही सहकारी वेगळ्या विचाराच्या पक्षासोबत गेले, तो त्यांचा वैयक्तिक प्रश्न आहे, विद्या प्रतिष्ठान व अॅग्रीकल्चरल डेव्हलपमेंट ट्रस्ट या संस्था सामाजिक काम करतात. दोन्ही संस्थांच्या कार्य़क्रमाला पवार कुटुंबिय कुटुंब म्हणून नेहमीच एकत्र आले आहे. त्याला राजकीय रंग देणे योग्य नाही.

गोविंदबाग राज्यातील मायबाप जनतेचे हक्काचे घर आहे. ते कायमच खुले आहे, तेथे कोणीही कधीही येऊ शकते, नेते म्हणून नाही तर कौटुंबिक नाते म्हणून आम्ही दिवाळीत एकत्र येणार आहोत. आमच्याच राजकीय मतभेद जरूर आहेत. परंतु राजकीय मतभेद व कौटुंबिक जबाबदाऱया वेगवेगळ्या असतात. राजकारणात कोणीही कुटुंबातील नाती, जबाबदारी डावलू नये, या मताची मी आहे. या दोन गोष्टीत गल्लत करू नये. जेथे राजकीय लढाईचा विषय येईल तेथे ती पूर्ण ताकदीने लढू, परंतु कुटुंबाचा विषय असेल तर राजकारण बाजूला ठेवू.