वडगाव शेरी : अहमदनगरकडे मोहरीचे खाद्यतेल घेऊन जाणारा पंचवीस हजार लिटरचा एक टँकर नगर रस्त्यावर खराडी येथील बीआरटी मार्गात पलटी झाला. टँकर बीआरटी मार्गात अडकल्यामुळे त्याला तब्बल तीन क्रेनच्या साहाय्याने बाहेर काढण्याचे काम सुरू आहे. दहा तास उलटून गेल्यानंतरही हा टँकर हटवता आलेला नाही.

या अपघतात नगर महामार्गावर पाच हजार लिटर तेलाची गळती होऊन वाहतूक कोंडी झाली. तब्बल दहा तासानंतरही टँकरला सरळ करण्यात प्रशासनाला यश आलेले नाही. ज्वलनशील पदार्थ असलेला हा टँकर तब्बल दहा तासापासून मोठी रहदारी असलेल्या नगर रस्त्यावर आडवा पडून आहे.

दरम्यान टँकरमधून गळती झालेले तेल भरून नेण्यासाठी स्थानिकांची गडबड सुरू आहे. नागरिक रस्त्यावर सांडलेले तेल भांड्यांमध्ये भरून नेताना दिसत आहे.