पुणे - सलग दोन ते तीन महिने चार-पाच तास ढोलचा आवाज कानावर पडत असल्याने मोठ्या प्रमाणात ध्वनिप्रदूषण होत आहे. त्यामुळे नागरिकांना कानदुखी, डोकेदुखी अशा विविध समस्यांना सामोरे जावे लागत आहे. रहिवासी झोनमध्ये सराव करणाऱ्या ढोल पथकांनी शहराच्या बाहेर किंवा आॕनलाईन पध्दतीने सराव करावा, अशी मागणी कर्वेनगर भागातील सोसायट्यांनी पोलिस प्रशासनाकडे केली आहे.

राजाराम पूल ते शाहू कॉलनी परिसरात नदीकाठी पाच-सहा ढोल पथक गणेशोत्सवाच्या आगोदर दोन ते तीन महिने दररोज चार ते पाच तास सराव करतात. जवळपास दोनशेपेक्षा अधिक वादक एकाच वेळी वादन करत असल्याने परिसरात मोठ्या प्रमाणात ध्वनीप्रदूषण होते.

त्यामुळे विद्यार्थ्यांचा अभ्यास न होणे, लहान मुले रडणे, जेष्ठ नागरिकांचे कान दुखणे अशा समस्यांमध्ये वाढ होत आहे. पोलिसंनी याकडे लक्ष देऊन रहिवासी झोनमधील ढोल पथके बाहेर स्थलांतरित करण्याची मागणी कर्वेनगर परिसरातील पिनाक आनंद, आशा रेसिडेन्सी, चिंतामणी रेसिडेन्सी, बराटे एम्पायर आदी सोसायट्यांनी पोलिस आयुक्तांकडे केली आहे.

प्रतिक्रिया

"पथकातील वादणामुळे स्थानिक रहिवाशांना त्रास होतो हे खरं आहे. आम्ही इतरांना त्रास देण्यासाठी वाजवत नाही हे देखील तेवढेच खरे आहे. परंतु, नागरिकांना त्रास होत असेल तर आमच्याकडून खबरदारी घेतली जाईल. पुढील वर्षापासून स्मार्ट पध्दतीने म्हणजे, आॕनलाईन सराव घेण्याचं नियोजन करत आहोत. - अॕड. मंदार गोसावी, अध्यक्ष, गंधार वाद्य पथक

"जेष्ठ नागरिक, लहान मुले यांना मोठ्या प्रमाणात ध्वनी प्रदूषणाचा त्रास सहन करावा लागतो. गणेशोत्सवापूर्वी दोन ते तीन महिने सराव चालतो, या दरम्यान नागरिकांना घरी बसणे देखील कठीण होते. आपली संस्कृती जपली पाहिजे परंतु इतरांना त्रास होता कामा नये याचे देखील भान ठेवावे. शहरातील ढोल पथके, गणपती मंडळ, पोलिस प्रशासन आणि राजकीय मंडळींनी यावरती एकत्रित पर्याय काढायला हवा. - हेमंत नाडकर्णी, रहिवासी कर्वेनगर

"नियमित कानावर ढोलचा तीव्र आवाज येत असेल तर माणसाची चिडचिड वाढू शकते, कानाची नस खराब होणे किंवा बहिरेपणा येणे अशा समस्या होऊ शकतात. असे झाले तर सुरवातीच्या ४८ तासांत उपचार घेणे आवश्यक असते. - डॉ.अजिक्य केळकर, कान नाक घसा तज्ज्ञ