हडपसर - साखरपुड्याचा कार्यक्रम आटपून घरी येत असताना ट्रकचा धक्का बसून झालेल्या अपघातात दुचाकीवरील महिलेचा मृत्य्‌ झाला, तर तिचे पती व सहा वर्षांचा मुलगा किरकोळ जखमी झाले आहेत. हा अपघात सासवड रस्त्यावर भेकराईनगर येथे विठ्ठल पेट्रोल पंपासमोर मंगळवारी दुपारी एकच्या सुमारास घडला. 

सारिका शिवाजी वाघेले (वय 31, रा. भेकराईनगर, फुरसुंगी) असे मृत्युमुखी पडलेल्या महिलेचे नाव आहे. महिलेचा पती शिवाजी अंकुश वाघेले (वय 38) व मुलगा यशराज (वय 6) हे दोघे किरकोळ जखमी झाले आहेत. याप्रकरणी हडपसर पोलिसांनी ट्रकचालक नाथा मल्लप्पा कनपट्टी (वय 25, रा. घुगाव, ता. अक्कलकोट, जि. सोलापूर) याला अटक केली. 

तिघे जण वडकी येथून साखरपुड्याचा कार्यक्रम आटपून घरी येत होते. त्या वेळी रस्त्यावरील खड्डे चुकविण्याच्या प्रयत्नात मागून येणाऱ्या ट्रकचा धक्का बसून दुचाकी खाली पडली. यात सारिका या ट्रकच्या मागच्या चाकाखाली आल्याने त्यांचा जागीच मृत्यू झाला, तर त्यांचा पती व मुलगा दुसऱ्या बाजूला पडल्याने बचावले. 

वीस दिवसांतील चौथा बळी 
सासवड रस्त्यावरील खड्ड्यांमुळे वीस दिवसांत झालेल्या अपघातात आतापर्यंत चार बळी घेतले आहेत. पुणे-सासवड रस्त्याची खड्ड्यांमुळे चाळण झाली आहे. ठिकठिकाणी रस्त्यावर खडी वर आली आहे. त्यामुळे अपघात व जीव मुठीत घेऊन प्रवास करण्याची वेळ नागरिकांवर आली आहे. हा रस्ता नुकताच सार्वजनिक बांधकाम विभागाकडून राष्ट्रीय महामार्गाकडे वर्ग झाला आहे. त्यामुळे या रस्त्याच्या रुंदीकरण व दुरुस्तीकडे दोन्ही विभागाचे दुर्लक्ष होत असल्यानेच अपघात होत असल्याचे नागरिकांचे म्हणणे आहे.