भोर - पुण्याच्या भोर तालुक्यातील भाटघर धरण क्षेत्रातील दुर्गम भागात तरंगत्या दवाखान्याद्वारे (लॉंचद्वारे) आरोग्य सेवा देण्यास सुरुवात करण्यात आली आहे. पाऊस काळात ही सेवा बंद असते. धरण क्षेत्रातील दुर्गम भागातील नागरिकांना उपचारासाठी शहरात येणं शक्य होत नसल्याने, शासनाकडून आक्टोंबर महिन्यांपासून ही आरोग्य सेवा दिली जाते.

दर आठवड्यातून बुधवार व शुक्रवार अशी दोन टप्प्यात वेगवेगळ्या १६ गावातील नागरिकांना ही आरोग्य सेवा देण्यात येणार आहे. गरजेच्या औषधसाठ्यासह डॉक्टर,नर्स, शिपाई व लॉंच ऑपरेटर यांच्या मार्फत लाँचद्वारे तरंगत्या दवाखान्यातून आरोग्य सेवा मिळण्यास सुरुवात झाल्याने भाटघर धरण क्षेत्रातील नागरिकांनी समाधान व्यक्त केले आहे.