मांडवगण फराटा - छत्रपती शिवाजी महाराजांचे सरलष्कर नेताजी पालकर यांचा तांदळी येथील ऐतिहासिक वाडा आज अखेरच्या घटका मोजत आहे. या ऐतिहासिक वाड्याच्या भिंतींची पडझड झाली असून सर्वत्र काटेरी बाभळींचे साम्राज्य पसरले आहे.

या ऐतिहासिक वारशाचे शासनाच्या पुरातत्त्व विभागाने संरक्षण व संवर्धन करावे अशी मागणी येथील इतिहास प्रेमी चेतन मचाले, पंचायत समिती सदस्य राजेंद्र गदादे व तांदळी येथील ग्रामस्थांनी केली आहे. नेताजी पालकर यांचे काही वंशज तांदळी येथे तर काही वंशज अहमदनगर जिल्ह्यातील काष्टी ( ता. श्रीगोंदा) येथे वास्तव्यास असून त्यांच्या, ग्रामस्थांच्या तसेच शासनाच्या समन्वयातून येथे नेताजींचे भव्य स्मारक उभारावे अशी मागणी येथील ग्रामस्थांकडून होत आहे.

नेताजी पालकर यांचा जन्म १६२० तर मृत्यू १६८१ मध्ये झाला. नेताजी पालकर हे दीर्घ काळ छत्रपती शिवाजी महाराजांच्या राज्याचे सरनौबत होते. त्यांना 'प्रतिशिवाजी' म्हणजेच 'दुसरा शिवाजी' असेही म्हटले जायचे. नेतोजी हे मूळचे पुणे जिल्ह्यातील शिरूर तालुक्यातील तांदळीचे परंतु त्यांचे वडील रायगड जिल्ह्यातील खालापूर येथे स्थायिक झाले होते.

नेताजींचा जन्म खालापूर येथील चौक या गावी झाला. त्यांनी अनेक युद्धे गाजवली होती. अफजलखानाच्या वधाच्या वेळी अफजलखानाच्या सैन्याला हुसकावून लावण्यात नेतोजींनी सिंहाचा वाटा उचलला होता. मात्र पुरंदरच्या तहानंतर श्रीमंत छत्रपती शिवाजी महाराजांनी वादविवादाचा बनाव करून त्यांना मोगलाकडे पाठविले,

त्यांनी आदीलशहावर आक्रमन केले. मुघलांनी त्यांचे धर्मांतर केले. नेतोजींना अरबस्तानात पाठविले. तसेच त्यांना नजरकैदेत ठेवले. यामुळे ते स्वराज्यापासून दूर होते.

त्यांनी मुघलांची चाकरी केली, पण नऊ वर्षांनी नेतोजी पुन्हा स्वराज्यात आले. पण स्वराज्यात पुन्हा आल्यावर श्रीमंत छत्रपती शिवाजी महाराजांनी पुन्हा योग्य विधी पार पाडून त्यांना परत हिंदू धर्मात प्रवेश दिला होता.

अशा महान पराक्रमी नेताजी पालकर यांच्या या ऐतिहासिक वाड्याचे पुनरुज्जीवन करुन येथे नेताजींचे स्मारक उभारावे अशी मागणी तांदळी ग्रामस्थांनी केली आहे.