पुणे - लग्नाचे आमिष दाखवत तरुणीवर बलात्कार करीत जबरदस्तीने तिचा गर्भपात केल्याप्रकरणी शिवसेना नेते रघुनाथ कुचिक यांना देण्यात आलेला जामीन न्यायालयाने रद्द केला आहे. अतिरिक्त सत्र न्यायाधीश व्ही. ए. पत्रावळे यांना हा आदेश दिला.

जामीन देताना नमूद करण्यात आलेल्या अटींचे आरोपीने उल्लंघन केले आहे. त्यामुळे आरोपीला जामिनावर सुटण्याचा अधिकार नाही. न्यायालयाने मंजूर केलेल्या जामिनाचा गैरवापर होत असल्याचे दिसून येते. त्यामुळे आरोपीचा जामीन रद्द करण्यात यावा. तसेच त्यांच्याविरोधात अजामीनपात्र अटक वॉरंट काढण्यात यावे, असा आदेश न्यायालयाने दिला आहे.

२४ वर्षीय तरुणीवर बलात्कार, जबरदस्तीने तिचा गर्भपात आणि जीवे मारण्याची धमकी दिल्याप्रकरणी कुचिक यांच्यावर शिवाजीनगर पोलिस ठाण्यात गुन्हा दाखल करण्यात आला होता. या गुन्ह्यात त्यांना न्यायालयाने काही अटी व शर्तीवर ११ मार्च २०२२ ला जामीन मंजूर केला होता.

त्यातील काही अटी व शर्तीचे कुचिक यांनी पालन केले नाही, असा अर्ज मुलीने शिवाजीनगर पोलिस ठाण्यात केला होता. तसेच कुचिक यांना मिळालेला जामीन रद्द करावा म्हणून तिने अॅड. सागर शिंदे यांच्यामार्फत सत्र न्यायालयात अर्ज केला होता. न्यायालयाने बंदी घातल्यानंतरही कुचिक यांनी मुलीला मेसेज केला.

स्पीड पोस्टाद्वारे काही फोटो पाठवले. मुलीच्या घरी गेले, असे त्यात नमूद आहे. त्या अर्जावर अॅड. शिंदे यांनी केलेल्या युक्तिवाद ग्राह्य धरून न्यायालयाने कुचिक यांना दिलेला जामीन रद्द केला. ॲड. शिंदे यांच्यासोबत त्यांचे सहकारी अॅड. सुधीर शिंदे व अॅड. विशाखा जगताप यांनी कामकाज पाहिले.