पुणे - पुणे महानगर क्षेत्र विकास प्राधिकरणाने (पीएमआरडीए) आपल्या सात हजार २०० चौरस किलोमीटर क्षेत्राचा वाहतूक आराखडा तयार करण्याचे काम हाती घेतले आहे. या कामाची निविदा प्रक्रिया पूर्ण झाली असून, एल ॲण्ड टी इन्फ्रास्ट्रक्‍चर इंजिनिअरिंग या कंपनीला हे काम देण्यात आले आहे.

हिंजवडी ते शिवाजीनगर हा मेट्रो प्रकल्प पीएमआरडीएकडून हाती घेण्यात आला आहे. या मार्गाला जोडणाऱ्या मार्गावर मेट्रो प्रकल्प राबविण्यासाठी पीएमआरडीएकडून आठ मार्ग निश्‍चित करण्यात आले होते. या मार्गाबाबत पीएमआरडीएने दिल्ली मेट्रोकडे विचारणा केली होती. या आठ मार्गांऐवजी संपूर्ण कार्यक्षेत्राचा वाहतूक आराखडा तयार करावा, त्यानंतर मेट्रोसाठी अन्य मार्गांची त्यातून निवड करावी, अशा सूचना दिल्ली मेट्रोने पीएमआरडीएला दिल्या होत्या. त्यानुसार पीएमआरडीएने संपूर्ण परिसराचा वाहतूक आराखडा तयार करण्यासाठी निविदा प्रक्रिया सुरू केली होती. सर्व प्रक्रिया पूर्ण होऊन हे काम एल ॲण्डी टी कंपनीला देण्याचा निर्णय पीएमआरडीएने घेतला आहे.

येत्या आठ ते दहा दिवसांत संबंधित कंपनीला पीएमआरडीएकडून या कामाची वर्कऑर्डर दिली जाणार आहे. पुढील अठरा महिन्यांत संबंधित कंपनीने संपूर्ण कार्यक्षेत्राचा अभ्यास करून अहवाल सादर करण्याचे बंधन पीएमआरडीएकडून घालण्यात आले आहे. त्यामध्ये हिंजवडी ते शिवाजीनगर या मार्गाव्यतिरिक्त अन्य कोणत्या मार्गावर मेट्रो प्रकल्प राबविता येईल, या शिवाय मोनोरेल, हायपरलूप यांचा वापर करता येईल तसेच कार्यक्षेत्राच्या हद्दीत कोणत्या भागात जलवाहतूक करणे शक्‍य आहे, आदीचा विचार करण्यात येणार आहे. हा अहवाल प्राप्त झाल्यानंतर हिंजवडी-शिवाजीनगर मार्गाव्यतिरिक्त मेट्रो प्रकल्पाचे काम हाती घेणे शक्‍य असलेल्या अन्य मार्गाचा सर्वंकष आराखडा तयार करण्याचे काम हाती घेण्यात येणार असल्याचे पीएमआरडीएच्या अधिकाऱ्यांनी सांगितले.