Pune - सार्वजनिक बांधकाम विभागाच्या रस्त्याच्या कडेला असणारे दिशादर्शक लोखंडी फलकांची चोरी करणाऱ्यास पोलिसांनी अटक केली आहे अशी माहिती पोलीस निरीक्षक नारायण पवार यांनी दिली.

सार्वजनिक बांधकाम विभागाचे स्थापत्य अभियांत्रिकी सहाय्यक माधव लक्ष्मण खंदारे यांनी याबाबत फिर्याद दिली आहे. पोलीसांनी संतोष मोघा डामसे रा.इंगळून ता.जुन्नर यास अटक केली आहे. त्याचे विरुद्ध चोरी तसेच सार्वजनिक मालमत्ता हानी प्रतिबंधक अधिनियमाचे कलमान्वये गुन्हा दाखल केला आहे.

डामसे याने इंगळून ते आंबे हातवीजकडे जाणाऱ्या सार्वजनिक बांधकाम विभागाने वाहनचालकांच्या सोयीसाठी लावलेले ४० हजार रुपये किमतीच्या १३ दिशादर्शक लोखंडी फलक वेळोवेळी कापून घरी आणले.या खांबाचा उपयोग घरासाठी केला असल्याचे आढळून आले आहे. त्याचेकडून सर्व मुद्देमाल पोलिसांनी हस्तगत केला असल्याचे पवार यांनी सांगितले.