पिंपळवंडी : भटकळवाडी काचळेमळा (ता.जुन्नर) येथील शेतकरी किशोर दत्तात्रय काकडे यांची दीड एकर कलिंगड फळबाग असुन गुरुवारी मध्यरात्री अंदाजे दोन ते तीनच्या सुमारास अज्ञात इसमाने येऊन शेतात पिकलेल्या कलिंगडांवर हत्याराने कापुन इतरत्र फेकुन दिले.

किशोर काकडे यांनी सांगितले की, आम्ही घरातील सर्व सदस्यांनी या रणरणत्या उन्हात जीव ओतुन कलिंगडाचे पीक घेतले, दररोज रात्री १ वाजेपर्यंत पिकाचे राखण करत असतो गुरुवारी रात्री सुद्धा आम्ही त्याठिकाणी होतो एक वाजल्याच्या नंतर आम्ही तेथुन निघुन गेल्यावर या अज्ञातांनी पाळत ठेऊन हाताशी आलेल्या पिकाचे नुकसान केले. यात आमचे अंदाजे १५ ते २०हजार रुपयां पर्यंत नुकसान झाले असुन जे फळ ५० दिवसाचे व मोठे झाले होते तसेच वीस दिवसांत ते विक्रीसाठी उपलब्ध होणार होते त्यांचेच नुकसान करण्यात आले आहे.

तसेच त्यांनी कलिंगड खाण्याच्या उद्देशाने कापले नसुन हा प्रकार जाणूनबुजून त्रास देण्याच्या उद्देशाने करण्यात आला असल्याचे आमचे मत आहे. काकडे यांच्या घरातील सदस्यांनी सांगितले की कलिंगडाचे पीक आम्ही प्रथमच घेतले असुन आता पर्यंत त्यासाठी लाखो रुपये खर्च झाले आहेत. काकडे यांनी सदर घटनेची तक्रार पिंपळवंडी पोलीस स्टेशनमध्ये दिली असुन पोलीस पुढील तपास करत आहेत.