पुणे - ‘पीएमपी’ सेवा परिणामकारक व्हावी म्हणून कर्मचाऱ्यांना आगार दत्तक देऊनही पालथ्या घड्यावर पाणी अशी स्थिती कायम राहिल्यामुळे अध्यक्ष सचिंद्र प्रताप सिंह यांनी बडगा उगारला.

कामावर सतत गैरहजर राहणारे ३६ कर्मचारी निलंबित करण्यात आले, तर आणखी बेशिस्त अशा तिघांवर बडतर्फीची कारवाई करण्यात आली. याशिवाय १५ आगारांतील १४२ कर्मचाऱ्यांवर आरोपपत्र ठेवण्यात आले. या कर्मचाऱ्यांना म्हणणे सादर करण्याचे आदेश देण्यात आला.

कर्मचाऱ्यांच्या कार्यशैलीत सुधारणा व्हावी, त्यांना शिस्त लागावी म्हणून सिंह यांनी विभागप्रमुख व सुपरव्हायझर दर्जाच्या अधिकाऱ्यांना आगारे दत्तक दिली. अधिकाऱ्यांनी आगारांची पाहणी केली तेव्हा अनेक कर्मचारी सतत गैरहजर असल्याचे, तसेच इतर अनेक कामात कसूर करताना आढळले. ही बाब गंभीर असल्याने त्यांना कारवाई करणे भाग पडले. या कारवाईमुळे अनेक कर्मचाऱ्यांचे धाबे दणाणले आहेत.

सिंह यांनी विविध स्तरावर प्रयत्न सुरु केले आहेत. प्रवाशांना चांगली सेवा मिळावी, बस रद्द होण्याचे प्रमाण कमी व्हावे या हेतूने त्यांनी उपाययोजना करण्यास सुरवात केली. दर शनिवारी पहाटे पाच वाजता नेमून दिलेल्या आगारात जाऊन कामाची पाहणी करण्याचे आदेश अधिकाऱ्यांना देण्यात आले. मागील दोन्ही शनिवारी अशी पाहणी केली. त्यानंतर प्रत्यक्षात काम सुरु आहे याची माहिती मिळाल्यानंतर सिंह यांनी कडक कारवाईस सुरुवात केली.

अध्यक्षांची दक्ष कार्यपद्धती

पीएमपी अध्यक्षपदाचा कार्यभार स्वीकारल्यापासून सचिंद्र प्रताप सिंह यांनी अनेक वेळा स्वतः बसमधून प्रवास करतात. अपेक्षित बदलांबाबत ते प्रवाशांशी चर्चा करतात. त्यामुळे गेल्या काही दिवसांत पीएमपीच्या उत्पन्नात काही प्रमाणात वाढही झाली. मात्र कर्मचाऱ्यांअभावी बसच्या फेऱ्या रद्द करणे भाग पडत असल्यामुळे अध्यक्षांवर थेट कारवाईची वेळ आली.

अशी झाली कारवाई

कारवाई वाहक चालक

निलंबित ३० ६

बडतर्फ २ -

आरोपपत्र ७८ ६४