पुणे महापालिका परिसरात भरधाव ट्रकच्या धडकेत एका दुचाकीस्वाराचा मृत्यू झाला होता.

या घटनेनंतर चालक ट्रकसह पसार झाला होता. त्यानंतर पुणे पोलिसांनी एक दोन नव्हे तर, तब्बल २५० सीसीटिव्ही फुटेज तपासून चालकाला बेड्या ठोकल्या आहेत.

याबाबत अधिक माहिती अशी की, २२ जानेवारी रोजी दिवसांपूर्वी पुणे महापालिका परिसरात भरधाव ट्रकच्या धडकेत पृथ्वीराज विष्णुकुमार शेळके (वय २२ ) या तरूणाचा मृत्यू झाला होता.

या अपघातानंतर ट्रक चालक ख्वाजामिया मस्तानमिया खानने घटनास्थळावरून पळ काढला होता. यामुळे पोलिसांना ट्रकचा नंबर मिळू शकला नव्हता.

दरम्यान,पोलिसांनी या घटनेची दखल घेत महापालिका भवन परिसरातील सीसीटीव्ही तपासले असता खान गाडगीळ पुतळा परिसरातून कुंभार वाडा चौकातून मालधक्का परिसरात गेल्याचे दिसले.

पोलिसांचे पथक त्या ठिकाणी पोहचला असता खान हैद्राबादला गेल्याची माहिती मिळाली. त्यानंतर काल मंगळवारी परत मालधक्का चौक परिसरात येणार असल्याची माहिती मिळाली असता पोलिसांनी सापळा रचून ख्वाजामिया मस्तानमिया खानला अटक केली.