पुणे : खुनाचा प्रयत्न करण्याबरोबरच विविध प्रकारचे गंभीर गुन्हे दाखल असलेल्या सराईत गुन्हेगारास खंडणी विरोधी पथकाने अटक केली. आरोपी 10 महिन्यापासून पोलिसांना गुंगारा देत होता.जयेश कृष्णा वाघ (वय 31, रा. माय फेयर रेसिडेन्सी, दिवान वाडी, वसई, पालघर) असे अटक केलेल्या आरोपीचे नाव आहे.

वाघ पोलिसांच्या अभिलेखावरील गुन्हेगार असून तो निलेश घायवळ टोळीचा सदस्य आहे. त्याने 10 महिन्यापूर्वी कोथरुड परिसरात एकाच्या खुनाचा प्रयत्न केला होता. तेव्हापासून तो फरारी होता. तो राहण्याची ठिकाणे सातत्याने बदलून पोलिसांना गुंगारा देत होता. दरम्यान, संबंधित आरोपी हा वसई येथील त्याच्या राहत्या घरी असल्याची खबर गुन्हे शाखेच्या खंडणी विरोधी पथकातील पोलिस कर्मचारी राजेंद्र लांडगे व नितीन रावळ यांना मिळाली.

सहायक पोलिस आयुक्त सुरेंद्रनाथ देशमुख, पोलिस निरीक्षक महेंद्र जगताप यांच्या मार्गदर्शनाखाली सहायक पोलिस निरीक्षक संदीप बुवा, पोलिस कर्मचारी नितीन कांबळे, राजेंद्र लांडगे,नितीन रावळ, विवेक जाधव, प्रफुल्ल चव्हाण यांच्या पथकाने वसई येथे जाऊन आरोपीस अटक केली. आरोपीला पुढील तपासाठी कोथरूड पोलिस ठाण्याच्या ताब्यात देण्यात आले.