पुणे - शहरातील जागोजागी होणाऱ्या वाहतूक कोंडीतून स्वत:ची सुटका करून घेण्यासाठी पुणेकर स्वत:च्या वाहनाला पसंती देत आहेत. त्यामुळे प्रत्येक पुणेकराकडे किमान एक वाहन असल्याचे आकडेवारीवरून दिसून आले आहे. शहराची लोकसंख्या ३४ लाख, तर वाहनांची संख्या ३६ लाख अशी परिस्थिती आहे. कोलमडलेले वाहतूक नियोजन, वाहतूक कोंडी आणि इंधनाचे दर वाढूनही पुणेकरांनी गेल्या वर्षात वाहन खरेदी करताना ‘टॉप गिअर’ टाकल्याचे यानिमित्ताने स्पष्ट आहे. 

शहरात गेल्या वर्षभरात मार्च २०१८ अखेर दोन लाख ९० हजार  नवी वाहने रस्त्यांवर आली आहेत. परिणामी, एकूण वाहन संख्येने ३६ लाखांचा आकडा ओलांडला आहे. त्यात, दुचाकींची संख्या २७ लाखांहून अधिक आहे. शहराची लोकसंख्या ३४ लाख दोन हजार इतकी आहे. लोकसंख्येच्या तुलनेत वाहनसंख्या अधिक असून प्रत्येक व्यक्तीकडे एकापेक्षा अधिक म्हणजे, १.०७ असे वाहनाचे प्रमाण आहे. त्याचा अर्थ काही पुणेकरांकडे दोन वाहने आहेत. शहराच्या पर्यावरण अहवालातून (२०१७-१८) ही आकडेवारी स्पष्ट झाली आहे.

गेल्या पंधरा वर्षात पहिल्यांदाच एवढ्या नव्या वाहनांची नोंदणी झाल्याचे महापालिकेच्या पर्यावरण अहवालातून आढळून आले आहे.

शहरातील सार्वजनिक वाहतूक व्यवस्था अर्थात ‘पीएमपी’ सक्षम करीत, बीआरटी आणि महिलांसाठी स्वतंत्र बस व्यवस्था आदी प्रयोग राबविण्यात येत आहेत. मात्र, पुणेकर सार्वजनिक वाहतूक व्यवस्थेपेक्षा स्वतःच्या वाहन खरेदीलाच पसंती देत आहेत. त्यामुळे दरवर्षी खासगी वाहनांची संख्या वाढत आहे. गेल्या काही वर्षात वर्षाला साधारणत: दीड ते पावणेदोन लाख नव्या वाहनांची प्रादेशिक परिवहन कार्यालयाकडे (आरटीओ) नोंदणी होत होती; परंतु गेल्या दोन-तीन वर्षांत हा आकडा आणखी वाढल्याचे दिसून आले. याच काळात इंधन दरवाढ होऊनही वाहन खरेदीचा वेग मंदावला नसल्याचे दिसून आले आहे.