पुण्यात झालेल्या पोर्शे अपघात प्रकरणातील अल्पवयीन आरोपी गेल्या काही दिवसांपासून सुधारगृहात आहे. या प्रकरणात आता मोठी माहिती समोर आली आहे. मुंबई उच्च न्यायालयाने या अल्पवयीन मुलाला जामीन मंजूर करत घरी सोडण्याचे आदेश दिले होते.

आज सायंकाळी सुमारे 8 वाजता या प्रकरणातील अल्पवयीन आरोपीची पुण्यातील बाल सुधारगृहातून सुटका करण्याता आली आहे. त्याला त्याच्या आत्याकडे सोपवण्यात आले आहे.

या अल्पवयीन आरोपीला जामीन मिळाल्यामुळे पुणे पोलिसांना मोठा झटका बसला आहे. त्याचबरोबर पोलिसांनी तपासामध्ये ढिसाळपणा केल्याचे आरोप आजा त्यांच्यावर होत आहेत.

पुण्यातील कसबा मतदारसंघाचे आमदार रवीद्र धंगेकरांनी तापस अधिकाऱ्यांवर जोरदार टीका केली आहे. त्याचबरोबर शिवसेना उद्धव बाळासाहेब ठाकरे पक्षाच्या नेत्या सुषमा अंधारे यांनीही पोलिसांवर टीका केली आहे.

19 मेच्या पहाटे पुण्यातील कल्याणीनगर येथे एका अल्पवयीन मुलाने नशेत दोन मोटारसायकल स्वार सॉफ्टवेअर अभियंत्यांना आपल्या पोर्शे कारने धडक दिली होती. ज्यामध्ये दोन्ही अभियंत्यांचा मृत्यू झाला होता.

अपघातानंतर सुमारे एक महिन्यानंतर न्यायमूर्ती भारती डांगरे आणि न्यायमूर्ती मंजुषा देशपांडे यांच्या खंडपीठाने अल्पवयीन आरोपीला दिलासा दिला आणि सांगितले की, अपघात दुर्दैवी असला तरी अल्पवयीन मुलाला निरीक्षण गृहात ठेवता येणार नाही. न्यायालयाने बालसुधारगृहाला अल्पवयीन आरोपीची सुटका करण्याचे आदेश दिले होते.

या अल्पवयीन मुलाचे आई-वडील आणि आजोबा सध्या तुरुंगात असल्याने त्याचा ताबा त्याच्या आत्याकडे देण्यात यावा असेही न्यायालयाने सांगितले होते.

रिअल इस्टेट डेव्हलपर विशाल अग्रवाल यांच्या मुलाला अपघात प्रकरणी सुरुवातीला बाल न्याय मंडळाने 300 शब्दांचा निबंध लिहिण्याच्या अटीसह जामीन मंजूर केला होता.

या निर्णयामुळे जनतेत प्रचंड रोष निर्माण झाला होता. त्यानंतर, पोलिसांनी पुनरावलोकनाची विनंती केली आणि बाल न्याय मंडळाने मुलाला निरीक्षण गृहात पाठवले होते. त्यानंतर या मुलाच्या आत्याने मुंबई उच्च न्यायालयात धाव घेतली होती.

पुणे पोर्शे कार अपघातातील मृतांच्या कुटुंबीयांनी सोमवारी मुख्यमंत्री एकनाथ शिंदे यांची भेट घेतली. पीडित कुटुंबाने मुंबईतील वर्षा बंगल्यावर मुख्यमंत्र्यांची भेट घेतली. मुख्यमंत्र्यांनी पीडित कुटुंबाला न्याय मिळवून देण्याचे आश्वासन दिले.

सूत्रांनी दिलेल्या माहितीनुसार, मुख्यमंत्री शिंदे यांनी पुणे पोलिस आयुक्तांशी फोनवर बोलून पुण्यातील सर्व बेकायदा पबवर कडक कारवाई करण्याचे आदेश दिले आहेत.