पुणेः पुण्यातल्या पोर्शे कार अपघात प्रकरणी अल्पवयीन आरीपीचे ब्लड सॅम्पल बदलल्याप्रकरणी ससून रुग्णालयातील दोन डॉक्टरांवर गुन्हे दाखल झालेले आहेत. याप्रकरणी पोलिसांनी बुधवारी मोठी कार्यवाही केली असून रुग्णालयातील महत्त्वाची कागदपत्रं जप्त केली आहेत.

ससून रुग्णालयातील ज्या डॉक्टर अजय तावरेने अल्पवयीन आरोपीचे ब्लड सॅम्पल बदलले आहेत, त्याच्यावर आणखी आरोप होत आहेत. तावरे हा रिपोर्टसाठी पोलिसांकडूनदेखील चिरीमीरी घ्यायचा, अशी माहिती सूत्रांनी दिली आहे. पोलिसांकडून तो शंभर-दोनशे रुपये घ्यायचा, कुठल्याही हद्दीमध्ये पार्ट्या करायचा आणि बिल मात्र पोलिसांना द्यायचा लावायचा, अशी माहिती पोलिस दलामधील वरिष्ठ अधिकाऱ्यांनी दिली. 'साम टीव्ही'ने हे वृत्त दिले आहे.

दरम्यान, बुधवारी पोलिसांनी ससून रुग्णालयामधून अत्यंत महत्त्वाची कागदपत्रं ताब्यात घेतली आहेत. पोलिसांनी तपासकामाला वेग दिला असून यापूर्वीच ससूनमधील सीसीटीव्ही फुटेज जप्त करण्यात आलेलं आहे. बुधवारी केलेल्या कार्यवाहीमध्ये मुख्य रजिस्टर आणि फॉरेन्सिक डिपार्टमेंटच्या कागदपत्रांचा समावेश आहे.

कागदपत्रांमधून पोलिसांना महत्त्वाचे धागेदोरे मिळण्याची शक्यता आहे. आतापर्यंत या प्रकरणात एकूण तीन गुन्हे दाखल झालेले आहेत. डॉ. अजय तावरे यांच्यावर गुन्हा दाखल झाल्यानंतर त्याने मी या प्रकरणात अनेकांची नावं घेणार असल्याचा इशारा दिला होता. त्यामुळे बुधवारी सुषमा अंधारे यांनी या प्रकरणात तावरेच्या जीवाला धोका होऊ शकतो, अशी भीती व्यक्त केली आहे.

काय म्हणाल्या सुषमा अंधारे?

पोर्शे कार अपघात प्रकरणात अनेक मोठे लोक गुंतू शकतात, ब्लड रिपोर्ट बदलण्यात आला, पिझ्झा-बर्गर खावू घालण्यात आले. तावरे हा फक्त रक्ताचं सॅम्पल बदलण्यापुरता मर्यादित नाही. जेव्हा तो म्हणतो की मी माझं तोंड उघडेल, याचा अर्थ दहा-बारा वर्षात त्याने काय काय पाहिलं हे समजून घ्यावं, असं अंधारे म्हणाल्या.