बालेवाडी : अपरिमित परिश्रम, जिद्द व आईच्या भक्कम पाठिंब्याच्या बळावर बाणेर येथील सावरी शिंदे हिने नुकत्याच दुबई येथे झालेल्या पावर लिफ्टिंग क्लासिक एशियन चॅम्पियनशिप २०२२ मध्ये कास्य पदक मिळवत घवघवीत यश संपादन केले आहे.

बाणेरची रहिवाशी सावरी शिंदे हिने दुबई येथे (ता. १ डिसेंबर ते ७ डिसेंबर) दरम्यान झालेल्या झालेल्या पावर लिफ्टिंग क्लासिक एशियन चॅम्पियनशिपमध्ये कास्य पदक मिळवत आपल्या देशाबरोबरच बाणेर बालेवाडीचे नाव ही जागतिक स्तरावर उंचावले आहे .

सावरी ही अकरा महिन्यांची असताना एका अपघातांमध्ये तिचे पितृछत्र हरपले. त्यानंतर तिच्या आईने मोठ्या जिद्दीने सावरीचे पालन पोषण तर केलेच पण त्याचबरोबर तिला शिक्षणाबरोबर खेळाकडे कसे नेता येईल यासाठी मेहनत घेतली. सावरीचे विद्या व्हँली शाळेत शिकत असताना गोळाफेक, भालाफेक खेळाची सुरुवात झाली, व आय सी एस सी बोर्डामध्ये या खेळात तिने चांगली कामगिरी करून रेकॉर्ड बनवला. त्यानंतर तिची राष्ट्रीय स्तरावर निवड होऊन भोपाळ येथे झालेले स्पर्धेतही तिने सुवर्णपदक पटकावले .

सावरी सध्या कर्वे रस्ता येथील कमिन्स कॉलेज मध्ये कम्प्युटर सायन्सच्या तिसऱ्या वर्षात आहे .गेल्या सात वर्षापासून ती गोळा फेक आणि भाला फेक हे खेळ खेळते. या खेळांमध्ये सावित्रीबाई फुले विद्यापीठा कडून ऑल इंडिया शॉटपुट साठी निवड करण्यात आली. यात तिने सुवर्णपदक पटकावले . या खेळा साठी तिला कुलविंदरसिंग चीमा मार्गदर्शन करतात. कमिन्स कॉलेजच्या स्पोर्ट्स डायरेक्टर अंजुश्री ऑगस्टिन यांनी तिला सर्वच खेळांमध्ये भाग घेण्याचा सल्ला दिला व तिची पावर लिफ्टिंग खेळाची सुरुवात झाली.

प्रशांत जगताप व त्यांचे दहा मित्र हे तिला सध्या पावर लिफ्टिंग साठी मोलाचे मार्गदर्शन करीत आहेत .यांच्या मार्गदर्शनाखाली सावरी सोम, बुध, आणि शनिवारी संध्याकाळी ७.३० ते १२.३० या वेळेमध्ये बाणेरहून फातिमा नगर येथे जाऊन पावर लिफ्टिंग चा सराव करते .घरी यायला रात्रीचे दीड वाजतात.यावेळी तिची आई तिच्याबरोबरच असते. पुण्यात सावरीचे तीन काका-काकू व ९० वर्षांच्या आजी ही राहतात या सगळ्यांचे तिला पाठबळ मिळते तसेच या घवघवीत यशामुळे बाणेर बालेवाडी भागांमध्ये सावरीचे चांगलेच कौतुक होत असल्याचे तिच्या आई मोहिनी शिंदे यांनी सांगितले.