पुणे - केंद्रीय विज्ञान तंत्रज्ञान विभागाच्या (डीएसटी) सचिवपदी प्रा. डॉ. अभय करंदीकर यांची नियुक्ती करण्यात आली आहे. डीएसटीची स्थापना झाल्यापासून दुसऱ्यांदाच सचिवपदी मराठी शास्त्रज्ञाची निवड झाली आहे. या आधी १९८६ ते १९९१ या काळात डॉ. वसंत गोवारीकर डीएसटीचे सचिव होते.

डीएसटीचे माजी सचिव एस. चंद्रा शेखर वैयक्तिक कारणास्तव कार्यकाळ संपण्यापूर्वी त्याच्या मूळ संस्थेत परतले आहे. भारतीय तंत्रज्ञान संस्था कानपूरचे संचालक असलेले प्रा. करंदीकर दूरसंचार विषयातील शास्त्रज्ञ आहेत. प्रा. करंदीकर यांची नियुक्ती करताना अधिकृत परिपत्रकात म्हटले आहे की

मंत्रिमंडळाच्या नियुक्ती समितीने प्रा. अभय करंदीकर यांची विज्ञान आणि तंत्रज्ञान विभागाचा सचिव पदावर नियुक्तीला मान्यता दिली आहे. त्याचे वय ६०वर्षे पूर्ण झाल्यापासून किंवा पुढील आदेश येईपर्यंत ते कार्यभार पाहतील.’’ करंदीकर यांची २०१८ मध्ये आयआयटी कानपूरचे संचालक म्हणून नियुक्ती केली होती.

विद्युत अभियंता असलेले प्रा. करंदीकर देशाच्या दूरसंचार क्षेत्रातील अतुलनीय योगदानासाठी ओळखले जातात. त्यांच्या संशोधनामुळे ५ जी आणि ग्रामीण ब्रॉडबँडच्या विस्ताराचा समावेश आहे. त्यांनी टेलीकॉम स्टँडर्ड्स डेव्हलपमेंट सोसायटी ऑफ इंडिया नावाच्या देशाच्या दूरसंचार मानक संस्थेचे अध्यक्ष म्हणून काम केले आहे. ग्रामीण भागात ब्रॉडबँड कनेक्टिव्हिटीचा प्रकल्प, भारतनेटचे डिझाइन आणि अंमलबजावणीसाठी त्यांनी सल्लागार म्हणूनही काम केले आहे.