पुणे : घराच्या प्रवेशद्वारासमोर फटाके वाजविण्यास मनाई केल्याने एका नागरीकास जातिवाचक शिवीगाळ केल्याचा धक्कादायक प्रकार पुढे आला आहे. याप्रकरणी कोंढवा पोलिस ठाण्यात 100 ते 150 जणांवर गुन्हा दाखल करण्यात आला आहे. हि घटना कोंढवा येथे शुक्रवारी रात्री 10 वाजता घडली.

सोहेल शेख, रंजित पंडीत, सोहेलचा भाऊ,वडील आणि त्यांच्या 100 ते 150 जणांच्या जमावर बेकायदेशिर प्रवेश करणे, कट रचणे, दरोडा, मारहाण व अनुसूचित जाती-जमाती अन्याय अत्याचार प्रतिबंधक कायद्यानुसार (अ‍ॅट्रॉसिटी) अशा विविध कलमांन्वये गुन्हा दाखल करण्यात आला आहे. याप्रकरणी 37 वर्षीय व्यक्तिने फिर्याद दिली आहे.

शुक्रवारी रात्री फिर्यादीच्या घराच्या प्रवेशद्वारासमोर पाच व्यक्ति फटाके वाजवित होत्या. त्यांना फिर्यादिने तेथे फटाके वाजविण्यास विरोध केला. त्याचा राग आल्याने पाच व्यक्तिनी त्यांच्या 100 ते 150 नातेवाईकांना तेथे बोलावले. त्यांनी फिर्यादीस धमकाविले. तसेच फिर्यादीसह त्यांच्या घरातील लोकांना लाथाबुक्क्यांनी, काठ्या, दगड, विटांनी मारहाण करून जखमी केले.