पुणे, ता. 9 : शहरानजीक गावांच्या शिवारात सध्या हुरडा पार्ट्यांनी जोर धरलाय. या पार्ट्यांत क्षमतेपेक्षा जास्त लोकांना प्रवेश देऊन कोरोनासंबंधीचे नियम मातीत घातले जात आहेत. एकीकडे सांस्कृतिक कार्यक्रम, लग्न, वाढदिवस व विविध धार्मिक कार्यक्रमांत नागरिकांच्या उपस्थितीची मर्यादा असताना, दुसरीकडे हुरडा पार्ट्या मात्र बिनदिक्कतपणे रंगताहेत. यंदा कोरोनामुळे पुण्यातील नागरिक व त्यांची कुटुंबे काही महिने घरामध्ये राहून कंटाळल्याने त्यांच्याकडून दैनंदिन जीवनात थोडासा बदल म्हणून हुरडा पार्ट्यांमध्ये सहभाग घेण्यावर भर दिला जात आहे; परंतु या पार्ट्यांमध्ये कोरोनासंबंधीचे नियम पायदळी तुडविले जात आहेत.

हेही वाचा - शासनाने कातकरी कुटुंबांसाठी घरकुले बांधली. पण बारा वर्ष होऊनही घरकुलांच्या नोंदीच नाहीत

शहरापासून काही किलोमीटर अंतरावर असणाऱ्या दौंड, शिरूर, हवेली, पुरंदर या तालुक्‍यांमध्ये ज्वारीचे उत्पादन जास्त प्रमाणात घेतले जाते. दरवर्षी या पट्ट्यांमधील कृषी पर्यटन केंद्रांसह काही शेतकरी शेतावर हुरडा पार्ट्यांचे आयोजन करतात. मागील काही वर्षांपासून काही खासगी व्यक्ती पार्ट्या आयोजित करू लागले आहेत. या पार्ट्या "कॉर्पोरेट' पद्धतीने होताहेत. कृषी पर्यटन केंद्रावर महाराष्ट्र राज्य कृषी व ग्रामीण पर्यटन सहकारी महासंघाचे (मार्ट) नियंत्रण आहे. या केंद्रांकडून शासकीय नियमांचे पालन केले जाते. मात्र काही व्यक्ती "कॉर्पोरेट' पद्धतीने हुरडा पार्ट्या करतात. त्याची कोणाकडेही नोंद नसते किंवा त्यांच्याकडून शासकीय नियमांचे पालन केले जात नसल्याचे चित्र आहे.

अशा होतात पार्ट्या

• हुरडा पार्टीसाठी प्रति व्यक्ती 600 ते 650 रुपये बिल आकारणी
• सकाळी 10.30 ते दुपारी साडेचारपर्यंत नाश्‍ता, जेवण व हुरडा
• कोरोनाच्या शासकीय नियमांचे सर्रास उल्लंघन
• गर्दीमुळे कोरोनाचा संसर्ग वाढण्याची भीती

यवतजवळील एका हुरडा पार्टीसाठी आम्ही आगाऊ नोंदणी केली. तेव्हा आम्हाला शंभर ते दोनशे नागरिक तेथे असतील असे आयोजकांनी सांगितले होते. प्रत्यक्षात तिथे एक ते दोन हजार नागरिक होते. कोरोनाच्या पार्श्‍वभूमीवर सोशल डिस्टंन्सिंगचे पालन केले जात नव्हते.
-मनोज कटारिया, व्यावसायिक

कोरोनाच्या पार्श्‍वभूमीवर सरकारने दिलेल्या नियमावलीची कृषी पर्यटन केंद्रांकडून अंमलबजावणी केली जाते; परंतु शेतांवर काही जणांकडून होणाऱ्या हुरडा पार्ट्यांवर कोणाचेही नियंत्रण नाही. त्यांच्याकडून नियमांचे पालन होत नाही.
-बाळासाहेब बराटे, अध्यक्ष, "मार्ट'

कोरोनासंबंधीचे नियम सर्वांना सारखेच आहेत. नियमांचे उल्लंघन करणाऱ्यांवर यापूर्वीही आम्ही कडक कारवाई केली आहे. हुरडा पार्टीच्या नावाखाली गर्दी जमवून नियमांचे उल्लंघन केले जात असेल, तर त्यांच्यावर कडक कारवाई करू.
-अभिनव देशमुख, पोलिस अधीक्षक, पुणे ग्रामीण