Pune Rain Update | पुणे : पुण्यात पावसाला सुरूवात झाली आहे. कालपासून राज्याच्या अनेक भागात पावसाने हजेरी लावली आहे. तर पुढच्या २४ तासामध्ये राज्यातील बहुतांश भागामध्ये पाऊस पडण्याची शक्यता आहे.

राज्यात १६ जूनपर्यंत मान्सून सर्वत्र दाखल होणार आहे. केरळात मान्सून ४ जूनपर्यंत तर मुंबई अन् कोकणात ८ ते १० जूनपर्यंत मान्सून दाखल होणार आहे.

दरम्यान मराठवाडा, विदर्भात येत्या २४ तासांमध्ये पाऊस हजेरी लावेल, असा अंदाज हवामान विभागाने व्यक्त केला आहे.

पुण्यात काल शहरात रात्री अनेक ठिकाणी पाऊस झाला. काही ठिकाणी गारपीटसुद्धा झाली. दरम्यान आज (मंगळवार) शहरात सकाळपासून ढगाळ वातावरण आहे. काही परिसरात पाऊस देखील सुरू झाला आहे. पुणे जिल्ह्यासह राज्यातील अनेक ठिकाणी यलो अलर्ट जारी केला आहे. हवामान खात्याकडून मुसळधार पावसाचा अंदाज व्यक्त केला आहे.

पावसाच्या हजेरीमुळे उकाडा थोडा कमी होऊन हवेतील गारवा वाढेल. त्यामुळे नागरिकांना उकाड्यापासून काही प्रमाणात दिलासा मिळाला आहे. तर रविवारी हिंगोली, भंडारा, गोंदिया, नागपूरसह इतर काही भागांध्ये अवकाळी पावसाने हजेरी लावली. या पावसामुळे शेतकऱ्यांचं मोठं नुकसान झालं आहे.