पुणे - शासकीय विश्रामगृहात महिलेला चाकूचा धाक दाखवून तिच्यावर अत्याचार केल्याप्रकरणी शिवसेनेचे माजी राज्यमंत्री उत्तम प्रकाश खंदारे यांच्यावर बलात्काराचा गुन्हा दाखल करण्यात आला आहे. मुलाचा सांभाळ करतो. तसेच लग्नाचे आमिष देत चाकूचा धाक दाखवून बलात्कार केल्याचे फिर्यादेत नमूद आहे.

या प्रकरणी एका ३७ वर्षीय महिलेने बिबवेवाडी पोलिस ठाण्यात फिर्याद दिली आहे. त्यानुसार पोलिसांनी उत्तम प्रकाश खंदारे (वय ६५, रा. सोलापूर), त्याचे साथीदार महादेव भोसले, बंडू दशरथ गवळी (रा. सोलापूर) यांच्यासह एका महिलेवर गुन्हा दाखल केला आहे. हा प्रकार बी रेस्ट हाऊस व बिबवेवाडीत २०१२ पासून ते आतापर्यंतच्या काळात घडला आहे. खंदारे हे शिवसेना-भाजप युतीसरकारमध्ये सामाजिक न्याय तथा क्रीडा मंत्री होते. तसेच उत्तर सोलापूर विधानसभा मतदारसंघातून ते चार वेळा आमदार म्हणून निवडून आले होते.

पोलिसांनी दिलेल्या माहितीनुसार, खंदारे याने फिर्यादी यांना लग्नाचे आमिष दाखविले व त्यांच्या मुलाचा सांभाळ करतो, असे सांगितले. त्यानंतर फिर्यादी यांना चाकूचा धाक दाखवून त्यांच्यावर बलात्कार करण्याचा प्रयत्न केला. फिर्यादींनी नकार दिला असता त्या पळून जाऊ नये, म्हणून त्याने फिर्यादीस विवस्त्र करून मारहाण केली. ही बाब कोणाला सांगितल्यावर खंदारे व इतरांनी फिर्यादी यांना जीवे मारण्याची धमकी दिली होती.

मुलाच्या संगोपनासाठी दिलेले धनादेश वटलेच नाही -

बलात्कारातून फिर्यादी या गर्भवती राहिल्या होत्या. त्यांना मुलाला जन्म दिला आहे. या मुलाच्या संगोपनासाठी खंदारे याने आर्थिक तरतूद म्हणून फिर्यादी यांना काही धनादेश दिले होते. परंतु ते वटले नाहीत. महिलेला जीवे मारण्याची धमकी दिल्याचा प्रकार समोर आला आहे. पोलिस उपनिरीक्षक नरेंद्र शिंदे या गुन्ह्याचा तपास करीत आहेत.