वडगाव निंबाळकर : एकत्र कुटुंबाचे रेशन कार्ड मध्ये नाव असताना स्वतःचे दुसरे बोगस रेशन कार्ड काढून रेशनचे धान्य घेत शासनाची फसवणूक केल्याबद्दल बारामती तहसीलदारांच्या आदेशाने संदीप धनंजय भोसले (रा. कानाडवाडी, चोपडज, ता. बारामती) यांच्या विरोधात वडगाव निंबाळकर पोलिस ठाण्यात गुन्हा दाखल करण्यात आला आहे.

आरोप ठेवण्यात आलेल्या संदीप यांनी वडीलांच्या रेशनकार्डमध्ये नाव समाविष्ट असताना तेथील नाव कमी न करता बेकायदेशीर मार्गाने दुसरे बोगस केशरी रेशनकार्ड काढत त्याद्वारे शासकीय धान्य घेत शासनाची फसवणूक केली. चोपडजमधील सामाजिक कार्यकर्ते संदीप हनुमंत गाडेकर यांनी भोसले यांच्या बोगस रेशनकार्डाबाबत बारामतीच्या तहसीलदारांकडे तक्रार दाखल केली होती. त्यानुसार चौकशी करण्यात आली.

संदीप भोसले हे कानाडवाडीचे रहिवाशी आहेत. त्यांचे वडील धनंजय जयसिंग भोसले यांच्या नावे रेशनकार्ड असून त्यात संदीप यांचे नाव समाविष्ट आहे. ते कमी न करता त्यांनी तहसील कार्यालयात जात पत्नी विद्यमान सदस्य ग्रामपंचायत चोपडज मनिषा संदिप भोसले यांच्या नावे केशरी रेशनकार्ड मिळविले. त्याद्वारे शासनाकडून धान्य घेत फसवणूक केली असल्याचे फिर्यादीत म्हटले आहे. याबाबत चोपडजचे गाव कामगार तलाठी अशपाक हनिफ इनामदार (रा. मुरुम, ता. बारामती) यांनी याबाबत पोलिसांत फिर्याद दिली.