पुणे : पुण्यात दैनिक ‘सकाळ’ निर्विवाद पहिल्या क्रमांकावर असल्याचे देशातील वर्तमानपत्रांच्या खपाचे परीक्षण करणाऱ्या ऑडिट ‘ब्यूरो ऑफ सर्क्युलेशन’ (एबीसी) या संस्थेच्या आकडेवारीनुसार सिद्ध झाले आहे. देशातील वृत्तपत्रांच्या खपाची ‘एबीसी’ची आकडेवारी माध्यम जगतात विश्वासार्ह मानली जाते.

पुणे आवृत्तीचा दैनिक ‘सकाळ’चा दररोजचा खप पाच लाख ४९ हजार ३३९ असल्याचे ‘एबीसी’ची ताजी आकडेवारी सांगते आहे. ही आकडेवारी ‘एबीसी’ने जुलै ते डिसेंबर २०२२ या काळात केलेल्या परीक्षणाची आहे. दैनिक ‘सकाळ’चा महाराष्ट्रातील एकूण खप १० लाख ६४ हजार ७२१ असल्याचे ‘एबीसी’ने म्हटले आहे. ‘एबीसी’ ही संस्था १९४८ मध्ये स्थापन झालेली आहे. ना-नफा तत्वावर चालणाऱ्या या संस्थेत प्रकाशक, जाहिरातदार आणि जाहिरात संस्था सदस्य आहेत. ‘एबीसी’च्या सदस्य प्रकाशकांच्या खपाची आकडेवारी तपासण्याचे काम संस्थेमार्फत केले जाते.

वाचकांशी अतूट नाते

पुण्यात वाचकांच्या पाठबळावर ‘सकाळ’ने ‘एबीसी’मध्ये आपले अव्वल स्थान कायम राखले आहे. वाचकांच्या रोजच्या जगण्याला आधार आणि आकार देणाऱ्या विश्वासार्ह बातम्या, लेख ही ‘सकाळ’ची परंपरा आहे.

काळानुसार बदलणाऱ्या विविध क्षेत्रांतील आव्हानांना सामोरे जाताना ‘सकाळ’ वाचकांच्या कुटुंबातील सदस्य बनून सोबत उभा राहतो. कुटुंबासाठी आणि कुटुंबातील प्रत्येकासाठी रोज नवा आशय घेऊन येणाऱ्या ‘सकाळ’चे वाचकांसोबतचे अतूट नाते पिढ्यान् पिढ्यांचे आहे. विस्तारणारे पुणे महानगर विकासाच्या नव्या वाटा शोधत आहे.

या शोधात दैनिक ‘सकाळ’ने सातत्याने तज्ज्ञांच्या सहकार्याने उत्तम आणि उपयुक्त ते निवडून वाचकांसमोर मांडले आहे. प्रसंगी परखड भूमिका घेऊन समाजाचे प्रश्न सोडविण्यासाठी ‘सकाळ’ने पुढाकार घेतला आहे. या साऱ्याचे प्रतिबिंब म्हणून दैनिक ‘सकाळ’ पुणेकर वाचकांच्या सातत्यपूर्ण पसंतीस उतरले आहे.