कुरकुंभ : पुणे-सोलापूर राष्ट्रीय महामार्गावर दौंड तालुक्यातील मळद हद्दीत सोमवारी ( ता. 21 ) दुपारी साडेबाराच्या सुमारास पुण्याकडे जाणार्‍या टाटा मॅटीझ या शाळेच्या विद्यार्थ्याची वाहतूक करणारी गाडी अचानक आग लागल्याने पूर्ण जळून खाक झाली. सुदैवाने प्रवास करणार्‍या व्यक्तींना आग लागल्याचे समजताच बाहेर पडल्याने बचावल्याने मोठी हानी टळली. (Pune solapur road vehicle fire accident)

पुणे-सोलापूर राष्ट्रीय महामार्गावरून टाटा मॅटीझ ही विद्यार्थ्यांची वहातूक करणारी गाडी ( एमएच. 12, जीझेड. 2725 ) पुण्याकडे जात होती. या गाडीला मळद हद्दीत अचानक आग लागली. या आगीत पूर्ण गाडी जळून खाक झाली. आग विझविण्यासाठी कुरकुंभ औद्योगिक वसाहतीतील अग्निशामक गाडी घटनास्थळी दाखल झाली. त्यांनी आग विझवली. मात्र तोपर्यंत पूर्ण गाडी जळून खाक झाली होती. या गाडीमध्ये दोन व्यक्ती प्रवास करीत होत्या. या दोन्ही व्यक्तींना गाडीला आग लागल्याचे लक्षात येताच ते बाहेर पडले. त्यामुळे दोघांचे प्राण वाचल्याची माहिती घटनास्थळी असलेल्या नागरिकांनी दिली. गाडीला अचानक लागलेल्या आगीचे कारण समजू शकले नाही.

पुणे-सोलापूर राष्ट्रीय महामार्गावर यापूर्वीही खडकी, रावणगाव, मळद, कुरकुंभ हद्दीत वाहनांना अचानक आग लागल्याच्या घटना घडल्या आहेत. धावत्या वाहनाला आग लागण्याच्या घटना दिवसेंदिवस वाढत असल्याने प्रवाशांसाठी चिंतेचा विषय बनला. यासंदर्भात वाहन कंपन्यांनी आवश्यक उपाययोजन करण्याची व वाहनचालक, मालकांनी दक्षता बाळगणे गरजेचे आहे.