मंचर, ता. २३ : पुणे जिल्ह्यात नव्याने ‘आपले सरकार सेवा केंद्र’ सुरू करण्यासाठी इच्छुक पात्र व्यक्तींकडून जिल्हाधिकारी कार्यालयाने अर्ज मागविले आहेत. जिल्ह्यातील ज्या ग्रामपंचायती व नागरी भागात सेवा केंद्र उपलब्ध नाहीत, त्या ठिकाणी गुणवत्तेनुसार नवीन केंद्रांना मान्यता देण्यात येणार आहे.
महाराष्ट्र शासनाच्या माहिती तंत्रज्ञान विभागाच्या शासन निर्णयानुसार सेवा केंद्रांचे वितरण, किमान पात्रता, पायाभूत सुविधा, मुलाखत व कार्यक्षमता यावर आधारित निवड प्रक्रिया करण्यात येणार आहे. अर्जाचा नमुना व रिक्त जागांची यादी www.pune.gov.in या संकेतस्थळावर उपलब्ध आहे.
इच्छुक उमेदवारांनी गुरुवार ३१ ऑगस्टपर्यंत सकाळी ११ ते संध्याकाळी ४ वेळेत संकेतस्थळावर अर्ज भरावा. आंबेगाव व जुन्नर तालुक्यातील अर्जदारांनी जुन्नर-आंबेगाव (मंचर) उपविभागीय अधिकारी कार्यालयाशी अधिक माहितीसाठी संपर्क साधावा, असे आवाहन आंबेगाव- जुन्नर विभागाच्या प्रांत अधिकारी अर्चना तांबे यांनी केली आहे.