पुणे : शहरातील रुग्णसंख्या कमी झाल्याने शिवाजीनगर येथील जम्बो कोवीड रुग्णालय बंद केले आहे, पण भविष्यात गरज पडल्यास त्वरित सुरू करण्याची महापालिकेची तयारी आहे, अशी माहिती आरोग्य प्रमुख डॉ. आशिष भारती यांनी दिली.

शहरातील कोरोना रुग्णांची संख्या कमी झाल्याने महापालिकेने जम्बो रुग्णालय, दळवी रुग्णालयातील कोरोना उपचार बंद केले आहेत. मात्र, सध्या दक्षीण आफ्रिकेतील ओमायक्रॉन हा कोरोनाचा विषाणू वेगात संक्रमित होत असल्याने केंद्र सरकार, राज्य सरकार सतर्क झाले आहे. आवश्यकतेनुसार निर्बंध लावले जात आहेत. पुणे महापालिकेनेही आरोग्य यंत्रणा सज्ज ठेवण्यासाठी तयारी ठेवली आहे. महापालिकेचे रुग्णालय, तेथील बेड, व्हेंटिलेटर, आयसीयू याची तपासणी सुरू केलेली आहे.

डॉ. भारती म्हणाले, ‘‘शहरात कोरोनाची स्थिती सामान्य आहे, पण गरज पडल्यास महापालिका दोन दिवसात जम्बो रुग्णालय पुन्हा सुरू करू शकते अशी तयारी आहे. रुग्ण संख्या कमी झाल्याने जम्बो रुग्णालयात बंद केले आहे. पण तेथे सर्व उपकरणे, बेड तेथेच आहे. रुग्णालयाचे शेड देखील चांगल्या स्थितीत आहे. त्यामुळे महापालिकेला नव्याने तयारी करावी लागणार नाही, केवळ संबंधित एजन्सीला आदेश देऊन पुन्हा डॉक्टर, नर्स उपलब्ध होतील.

आफ्रिकेतून आलेल्या नागरिकाची तपासणी -

पुण्यात काही दिवसांपूर्वी दक्षिण आफ्रिकेतून एक नागरिक पुण्यात आला आहे. महापालिकेने त्याची आरटीपीसीआर चाचणी केली असून, त्याचा अहवाल अद्याप प्राप्त झालेला नाही. जर या प्रवाशाचा अहवाल पॉझिटिव्ह आला, त्यामध्ये ओमायक्रॉन हा नवा विषाणू आहे की नाही हे तपासण्यासाठी जीनोम सिक्वेन्सिंग करावे लागणार असल्याची माहिती सहाय्यक आरोग्य प्रमुख डॉ. संजीव वावरे यांनी दिली.

कोरोनाच्या नव्या विषाणूचा प्रसार रोखण्यासाठी महापालिका सज्ज आहे. आफ्रिका, आॅस्ट्रिया, जर्मनी, झिम्बाब्वे या देशातून नागरिक पुण्यात आल्यास त्याची माहिती विमानतळ प्राधिकरणाकडून घेण्यात येईल. प्रतिबंधात्मक उपाय म्हणून अशा नागरिकांना लक्षणे नसली तरी त्यांची आरटीपीसीआर तपासणी केली जाणार आहे.

डॉ. वावरे म्हणाले, लसीकरणाचे प्रमाण कमी असलेल्या देशांमध्ये ओमायक्रॉन विषाणूची लागण झाली आहे. या देशांमधून जे नागरिक पुण्यात येतील त्यांची तपासणी केली जाईल. पण ज्यांनी लसीचे दोन्ही डोस घेतले आहेत, ते अशांना जास्त धोका नाही.