पाटस : पुणे सोलापुर महामार्गाने लातुरहुन पुण्याकडे जाणाऱ्या आराम बसचा दौंड तालुक्यातील पाटस येथे भीषण अपघात झाला. यामध्ये दोन महीला प्रवाशांचा जागीच मृत्यू झाला.तर एक गंभीर तसेच तीस प्रवाशी जखमी झाले.

गुरुवारी (ता.२६) पहाटेच्या सुमारास आराम बस रस्त्याच्या बाजुला उभ्या असणाऱया सिमेंट वाहतुकीच्या ट्रकला धडकल्याने हा भीषण अपघात झाला.सत्याभामा बोयने (वय ७२) रा.शहाजा-निलंगणा (लातुर),श्वेता पंचाक्षरी रा.शहाजा-निलंगणा (जि.लातुर) अशी मयतांची नावे आहेत.तर बाळासाहेब शिरखाने रा.सोलापुर हे गंभीर जखमी आहेत.

याबाबत पाटस पोलिस चौकीचे फौजदार संजय नागरगोजे यांनी माहीती दिली.पुणे सोलापुर राष्ट्रीय महामार्गाने लातुरहुन एक आऱाम बस प्रवाशी घेवून पुण्याकडे जात होती. पहाटेच्या सुमारास दौंड तालुक्यातील पाटस घाटात रस्त्यात बंद पडलेल्या सिमेंट वाहतुकीच्या ट्रकला आराम बसची जोराची धडक बसली. अपघात इतका भिषण होता की बस भररस्त्यात उलटली.

आराम बसच्या डावीकडील भागाचा पुरता चुराडा झाला.यावेळी दोन महीला प्रवाशांचा जागीच मृत्यू झाला.तर एक जण गंभीर जखमी झाले.मृतांमध्ये दोन्ही महीलेंचा समावेश आहे.एकुण तीस जण जखमी झाले. पहाटेच्या वेळी प्रवाशांचा आक्रोश,बसमध्ये रक्ताचे सडे या दृश्याने अनेकांची मने हेलावून गेली.

माहीती मिळताच यवत पोलिस ठाण्याचे पोलिस निरीक्षक हेमंत शेडगे,पाटस पोलिस चौकीचे उपनिरीक्षक संजय नागरगोजे,महामार्ग पोलिस उपनिरीक्षक महेश कोंडुभैरे,श्रीहरी पानसरे आदी पोलिसांनी घटनास्थळी धाव घेतली.

यावेळी नागरीकांच्या मदतीने बसमधील जखमी व्यक्तींना तत्काळ बाहेर काढुन उपचारासाठी पाठवून देण्यात आले.मृत व्यक्तींना शवविच्छेदनासाठी पाठविण्यात आले.यावेळी पुरुष,महीला,लहान मुले-मुलींसह एकुण तीस जण जखमी झाले.गंभीर जखमी व्यक्तीला उपचारासाठी ससुन रुग्णालयात पाठविण्यात आले.

दरम्यान,मयत श्वेता पंचाक्षरी या पुणे दिनानाथ मंगेशकर हाॅस्पीटल मध्ये डाॅक्टर असल्याचे समोर आले आहे. अपघाता नंतर ट्रकमधील सिमेंट रस्त्यावर पसरलेले गेले.शिवाय आराम बस रस्त्यात उलटल्याने वाहतुकीचा खोळंबा झाला. पोलिसांना पर्यायी मार्गाने वाहतुक वळवावी लागली.