पाटस : पुणे सोलापुर महामार्गावर पाटस (ता.दौंड) हद्दीत लक्झरी बस चालकाचा बेफिकीरपणा काही प्रवाशांच्या मुळावर उठला. लक्झरी चालकाने विरुध्द दिशेला असणाऱया ढाब्यावर जाण्यासाठी बस अचानक पलिकडील मार्गावर घेतली.यावेळी ट्रक आणि बस यांच्यात धडक होवुन अपघात झाला.यामध्ये एका प्रवाशाचा मृत्यू तर ट्रक चालकासह बसमधील चौदा प्रवाशी जखमी झाल्याची घटना घडली.

याबाबत पोलिस हवालदार सुनिल बगाडे यांनी माहीती दिली.पुणे सोलापुर महामार्गावरुन मंगळवारी लक्झरीबस ही पुणे बाजुकडुन सोलापुरला जात होती. दौंड तालुक्यातील पाटस हद्दीत रात्री साडे अकरा वाजता टोलनाक्याच्या पुढे बस चालक याला जेवणासाठी पलिकडील बाजुला असणाऱया ढाब्याकडे जायचे होते. मात्र, चालकाने कसलीच तमा न बाळगता,वाहतुकीचे कोणतेच नियम न पाळता, समोरील बाजुच्या वाहनांना इशारा न करताच बस बिनधास्त विरुध्द दिशेच्या मार्गावर घेतली.

त्यावेळी पुण्याकडे जाणारा एक मालट्रक व बस यांच्यात भीषण धडक झाली.या भीषण अपघातात बसमधील प्रवासी मारुती ग्यानबा वडेर (वय २६) राहणार षिकारा ता.मुखेड जि.नांदेड यांचा जागीच मृत्यू झाला.तर ट्रक चालक हवासिंग,बसमधील प्रवासी-अर्चना देशमुख,श्रेया श्रीकंठवार,बालाजी पाटील,यश पाटील,दिगंबर जाधव,फिरोज काझी,लक्ष्मीबाइ सुद्रे,उषाबाइ खांडेकर,विठ्ठल कोरंबे,माधव इंगळे,माधव पांचाळ,विजय वडेर,भाऊ वडेर हे जखमी झाले.

माहीती मिळताच यवत पोलिस ठाण्यातील सहायक पोलिस उपनिरीक्षक सुनिल बगाडे,आबा बंडगर,अजित इंगोले,रमेश चव्हाण यांनी घटनास्थळी धाव घेतली. जखमींना उपचारासाठी दवाखान्यात दाखल केले.मयत वडेर यांचा मृत्यूदेह विच्छेदनासाठी पाठवुन दिला.दरम्यान,पांडुरंग वडेर यांच्या फिर्यादीवरुन लक्झरी चालका विरुध्द गुन्हा दाखल करण्यात आला असल्याचे पोलिसांनी सांगितले.