पुणे - प्रशासनाने खानावळी, हॉटेल्स आणि रेस्टॉरंटमध्ये बसून खाण्यास बंदी घातल्यामुळे जेवायचे कुठं हा मोठा प्रश्न निर्माण झाला आहे. खोलीवर खाण्याची व्यवस्था उपलब्ध नाही. तर पार्सल नेण्यासाठी अधिकचे दहा रुपये मोजावे लागत आहे. नक्की हे पार्सल घेऊन खायचे कुठे? असा सवाल विद्यार्थ्यांनी प्रशासनाला विचारला आहे. 

शनिवारपासून शहरातील खाणावळी आणि हॉटेलमध्ये खाण्यास बंदी घातली असून, फक्त पार्सल सेवा सुरू ठेवण्यात आली आहे. पर्यायाने स्पर्धा परिक्षेसाठी पुण्यात थांबलेले, विविध महाविद्यालयांमध्ये शिकत असलेल्या विद्यार्थ्यांचे जेवणाचे हाल होत आहे. प्रतीक वाकचौरे सांगतो,‘‘आज दुपारच्या जेवणासाठी वेगळेच दिव्य करावे लागले. खाणावळीतून पार्सल घेऊन आम्ही जवळच असलेल्या मित्राच्या रूमवर ते खाल्ले. संध्याकाळी परत पार्सल वेळेवर मिळेल का, हा मोठा प्रश्न आहे.’’ निदान विद्यार्थ्यांनातरी खाणावळीत जेवणाची व्यवस्था असायला हवी अशी मागणी विद्यार्थ्यांनी केली आहे. विद्यार्थ्यांबरोबरच प्रवासी नागरिक, खाणावळीवर अवलंबून असणारे मजूर आणि कर्मचारी यांना मोठ्या प्रामाणावर अनेक अडचणींचा सामना करावा लागत आहे. 

विद्यार्थी म्हणतात... 
- पार्सल घेवुन खाण्याची व्यवस्था नाही 
- पार्सलसाठी अधिकचे पाच ते दहा रुपये मोजावे लागतात 
- संध्याकाळी सहा नंतर संचारबंदी असल्यामुळे खाणावळी लवकर बंद होतात 
- खाणावळींवर वेळेचे निर्बंध लादल्यामुळे गर्दी वाढते 
- विद्यार्थ्यांना तरी तेथे जेवण्याची सुविधा उपलब्ध करून द्यावी 
- खाणावळींचा वेळ वाढवावा 

गेली वर्षभर आमचे मोठे शैक्षणिक नुकसान झाले आहे. आता कुठे पूर्वपदावर येत आहे तर पुन्हा एकदा निर्बंध लादण्यात आले आहे. या निर्बंधामुळे आमच्या रोजच्या खाण्यापिण्यावर मोठ्या प्रमाणावर परिणाम झाला आहे. पार्सलद्वारे जेवण करणे आमच्यासाठी आव्हानात्मक ठरत आहे. 
- वर्षा जगधने, विद्यार्थिनी