वालचंदनगर (ता.इंदापूर) : येथे अज्ञात पाच चाेरट्यांनी गॅस कटर साहय्याने एटीएम व सोन्या चांदीचे सराफी दुकान फोडून लुटण्याचा प्रयत्न केला. मात्र ग्रामस्थांच्या सर्तकतेमुळे चोरट्यांना गावातून पळ काढला.

इंदापूर तालुक्याच्या पश्‍चिम भागामध्ये नीरा नदीच्या तीरावरती निरवांगी गाव आहे. सोमवार (ता.२०) रोजी अज्ञान पाच चोरट्यांनी निरवांगी गावामध्ये धुमाकुळ घातला. सुमारास पहाटे तीन वाजण्याच्याएटीएम चे शटर उचकाटून आतमध्ये प्रवेश केल्यानंतर एटीएमच्या कॅमेऱ्यावरती काळ्या रंगाचे वंगन टाकून सीसीटीव्ही कॅमेरे बंद करण्याचा प्रयत्न केला. एटीएमचे मशिन गॅस कटरच्या साहय्याने फोडण्याचा प्रयत्न केला. मात्र त्याला यश आले नसल्याने चोरट्यांनी संतोष गुरव यांच्या ओम ज्वेलर्स दुकानाकडे मोर्चा वळविला.

गुरव यांच्या दुकानाचे शटर उचकाटून आतमध्ये एका चोरट्याने प्रवेश केला होता. उर्वरित चोघे जण दुकानाच्या बाहेर पाळतीवर होते. मात्र दुकाना शेजारी राहणाऱ्या नागरिकांना शटर उचकटण्याचा आवाज आल्याने त्यांनी दुकानदार गुरव व गावातील नागरिकांना गावामध्ये चोर आले असून गुरव यांचे सराफी दुकानामध्ये चोरी करण्याचा प्रयत्न सुरु असल्याचे सांगितले.

गावातील ग्रामस्थांनी तातडीने दुकानाकडे दुचाकीवरुन धाव घेतली. नागरिक दुकानाकडे येत असल्याचे लक्षात येताच चोरट्यांनी धुम ठोकली. ग्रामस्थांच्या सर्तकतेमुळे सोने,चांदीच्या दुकानामध्ये होणारी चोरी रोखली गेली. वालचंदनगर पोलिस ठाण्याचे साहय्यक पोलिस निरीक्षक बिरप्पा लातुरे यांनी तातडीने घटनास्थळी भेट देवून तपासाला सुरवात केली.