किरकटवाडी : शाळांना लागलेली उन्हाळ्याची सुट्टी, शनिवारी रमजान व रविरची सुट्टी यांमुळे खडकवासला परिसरात मोठ्या प्रमाणात पर्यटक आले असून खडकवासला धरण चौकात मोठी वाहतूक कोंडी झाली आहे. खडकवासला ते डिआयएटी, खडकवासला ते कोल्हेवाडी व खडकवासला-एनडीए रस्ता अशा सर्व बाजूंना वाहनांच्या लांबच लांब रांगा लागल्या आहेत. वाहनांची संख्या जास्त असल्याने वाहतूक सुरळीत करताना पोलीस कर्मचाऱ्यांची दमछाक होताना दिसत आहे.

खडकवासला धरण चौपाटीही हाऊसफुल्ल झालेली दिसत आहे. चौपाटी परिसरात अनेक पर्यटकांनी रस्त्याच्या दुतर्फा वाहने उभी केल्याने वाहतुकीस अडथळा निर्माण होत आहे. खडकवासला गावातून पुढे सिंहगड, पानशेतकडे जाणाऱ्या व येणाऱ्या पर्यटकांची संख्याही जास्त असल्याने वाहतूक कोंडी झाली आहे. तसेच विवाह सोहळे, बाजार समितीच्या निवडणुकीनिमित्त सुरू असलेले प्रचार दौरे यांमुळेही वाहतूक कोंडीत भर पडताना दिसत आहे. वाहतूक सुरळीत करण्यासाठी अतिरिक्त पोलीस कर्मचारी पाठविण्यात आल्याची माहिती हवेली पोलीस ठाण्याचे पोलीस निरीक्षक सचिन वांगडे यांनी दिली आहे.

धरण चौकात वाहने घासत असल्याचा परिणाम...... धरण चौकापासून पुढे कॉंक्रिटीचा रस्ता तयार करण्यात आला आहे परंतु ज्या ठिकाणी रस्ता सुरु होतो तेथे योग्य प्रकारे भर न टाकण्यात आल्याने चारचाकी वाहने घासत आहेत. वाहनांचे नुकसान होत असल्याने वाहनचालकांना येथून सावकाश वाहने काढावी लागत असल्याने त्यामुळेही वाहतूक कोंडीत भर पडत आहे.

"वाहतूक सुरळीत करण्यासाठी वाहतूक पोलीस तैनात आहेत मात्र वाहनांची संख्या जास्त असल्याने व रस्त्याचे काम सुरू असल्याने वाहतूक कोंडी होत आहे. सहाय्यक पोलीस निरीक्षक व इतर काही पोलीस कर्मचाऱ्यांना वाहतूक सुरळीत करण्यासाठी पाठवले आहे." सचिन वांगडे, पोलीस निरीक्षक, हवेली पोलीस ठाणे.