पुणे : मेट्रोच्या कामामुळे गणेशखिंड रस्त्यावर मोठ्या प्रमाणावर वाहतूक कोंडी होत आहे. त्यातच सावित्रीबाई फुले पुणे विद्यापीठाच्या मुख्य प्रवेशद्वारासमोरील आनंदऋषिजी महाराज चौकातील परिस्थिती नियंत्रणाबाहेर गेल्याने वाहतूक पोलिसांनी काही नवे बदल केले आहेत. त्यामुळे विद्यापीठात प्रवेश करण्यासाठी मुख्य प्रवेशद्वाराऐवजी मिलेनियम गेटचा (चतुःश्रुंगी पोलिस स्टेशन) वापर सुचविण्यात आला आहे. त्यामुळे नागरिकांना काहीसा दिलासा मिळाला आहे.

शनिवारी सकाळपासूनच नव्या बदलांची अंमलबजावणी सुरू झाली. विद्यापीठाच्या मुख्य प्रवेशद्वाराकडील वळण अडथळे लावून बंद करण्यात आले. बाणेर रस्त्यावरील हाय स्ट्रीट ते विद्यापीठापर्यंतच्या भागात मेट्रोने बॅरिकेड््स आत ओढून घेतले आहेत. त्यामुळे वाहतुकीसाठी थोडी जास्त मोकळी जागा मिळण्यास मदत झाली. औंधकडून शिवाजीनगरकडे येणारी जड वाहनांची वाहतूक ब्रेमेन चौकातूनच वळविण्यात आली. त्यामुळेही वाहनचालकांना थोडा फरक जाणवला.

शनिवारी खासगी कार्यालयांसह काही सरकारी कार्यालयांना सुटी असल्याने वाहतूक तुलनेने कमी होती. तरीही कोंडीच्या संदर्भात थोडासा दिलासा मिळाला. यानंतरही मेट्रोचे काम पूर्ण होईपर्यंत वाहतूक कोंडी टाळणे किंवा कमी करणे पोलिसांसाठी प्रचंड आव्हानात्मक असेल. परिणामी वाहनचालकांच्या सहनशीलतेची परीक्षा यापुढील काळातही होईल.

पर्यायी मार्गाचा अभाव

शिवाजीनगरकडून बाणेर, औंध, बालेवाडी, बावधन, पिंपळे गुरव अथवा सांगवी आदी भागात जाण्यासाठी किंवा तिकडून शहरात येण्यासाठी पर्यायी रस्ताच नाही. त्यामुळे वाहनचालकांसाठी विद्यापीठ चौकातून जाणे हाच एक पर्याय आहे. पूर्वी मोठे पूल असूनही तेथे वाहतूक कोंडी होत होती. आता मेट्रोच्या कामामुळे परिस्थिती हाताबाहेर गेली आहे. शहरात पर्यायी किंवा समांतर रस्ते नसल्यामुळे नागरिकांचे प्रचंड हाल होत आहेत. वाहतूक कोंडीमुळे मोठ्या प्रमाणावर कार्बन उत्सर्जन होत असल्याचे तज्ज्ञांनी सांगितले.