पुणे : जिल्ह्यातील सुशिक्षित, बेरोजगार युवकांसह पशुपालक आणि शेतकऱ्यांना स्वयंरोजगाराचे साधन उपलब्ध करून देण्यासाठी पशुसंवर्धन विभागामार्फत विविध योजनांसाठी ४ ते १८ डिसेंबरपर्यंत ऑनलाइन अर्ज स्वीकारले जाणार आहेत.

नावीन्यपूर्ण योजनेअंतर्गत दुधाळ गाई-म्हशींचे वाटप करणे, शेळी-मेंढी वाटप, एक हजार मांसल कुक्कुट पक्षांच्या संगोपनासाठी शेड उभारणीस अर्थसाहाय्य, शंभर कुक्कुट पिलांचे वाटप आदी योजनांसाठी ऑनलाइन पद्धतीने लाभार्थी निवड प्रक्रिया २०२१-२२ या वर्षात राबविण्यात येणार आहे. योजनांचा लाभ घेण्यासाठी https://ah.mahabms.com या संकेतस्थळावर अर्ज उपलब्ध आहे. तसेच, गुगल प्ले-स्टोअरवर एएच-महाबीएमएस हे ॲन्ड्रॉईड मोबाईल ॲप उपलब्ध आहे.

योजनेचा लाभ घेण्यासाठी अर्ज केवळ ऑनलाइन पद्धतीनेच स्वीकारण्यात येतील. अधिक माहितीसाठी तालुक्यातील पशुसंवर्धन विभाग पंचायत समिती, तालुका लघु पशुवैद्यकीय सर्व चिकित्सालय अथवा नजीकच्या पशुवैद्यकीय केंद्रावर संपर्क साधावा, असे आवाहन जिल्हा पशुसंवर्धन उपायुक्त यांनी केले आहे.