पुणे: सावित्रीबाई फुले पुणे विद्यापीठ आणि वैकुंठ मेहता राष्ट्रीय सहकारी व्यवस्थापन संस्था यांच्यात सामंजस्य करार करण्यात आला आहे. या करारानुसार व्यवस्थापन क्षेत्रातील पदवी, पदविका आणि प्रमाणपत्र अभ्यासक्रम सुरू करण्यात येणार आहेत. त्यातून व्यवस्थापन क्षेत्रातील नवोपक्रम, स्टार्टअप अशा अनेक संधी विद्यार्थ्यांना उपलब्ध होणार आहे.

या सामंजस्य करारावर नुकत्याच स्वाक्षरी करण्यात आली. यावेळी विद्यापीठाचे कुलगुरू डॉ. नितीन करमळकर, विद्यापीठाच्या ‘इनोव्हेशन सेल’च्या संचालिका डॉ. अपूर्वा पालकर, व्यवस्थापन परिषद सदस्य प्रसेनजीत फडणवीस, वैकुंठ मेहता राष्ट्रीय सहकारी व्यवस्थापन संस्थेच्या संचालिका डॉ. हेमा यादव, कुलसचिव व्ही. सुधीर, ए. के. तिवारी आदी उपस्थित होते.

सहकार क्षेत्रात नवे उद्योजक निर्माण करण्याच्या हेतूने उद्योग नवीन तंत्रज्ञानावर आधारित अभ्यासक्रम देण्याचा प्रयत्न असल्याचे डॉ. करमळकर यांनी स्पष्ट केले. यामुळे विद्यार्थ्यांना माफक शुल्कात अनेक नवीन अभ्यासक्रम उपलब्ध होऊ शकणार आहेत. सहकार विषयात नवीन स्टार्टअप तयार होण्यास मदत होईल, असे डॉ. पालकर यांनी सांगितले.