पुणे, ता. ८ : विश्रांतवाडी पोलिसांनी एका सराईत वाहनचोराला ताब्यात घेऊन त्याच्याकडून सहा दुचाकी जप्त केल्या. जप्त केलेल्या वाहनांची किंमत चार लाख ८० हजार रुपये आहे. विश्रांतवाडी पोलिस ठाण्यात दाखल असलेल्या वाहनचोरीच्या गुन्ह्यांचा तपास सुरू असताना पोलिस अंमलदार वामन सावंत आणि संजय बादरे यांना एका संशयिताबाबत माहिती मिळाली. त्याआधारे पोलिसांनी संशयित ओंकार रामभवन यादव (वय २०, रा. शांतिनगर, येरवडा) याला ताब्यात घेतले. त्याची सखोल चौकशी केली असता त्याने विविध ठिकाणांहून दुचाकी चोरल्याची कबुली दिली. जप्त केलेल्या सहा दुचाकींच्या आधारे वाहनचोरीचे आणखी गुन्हे शोधण्याचे काम पोलिसांकडून सुरू आहे. संशयिताकडून आणखी काही वाहनचोरीच्या घटनांची माहिती मिळण्याची शक्यता असून, त्या अनुषंगाने तपास सुरू आहे.