वालचंदनगर : बेलवाडी (ता.इंदापूर) जवळ बारामती-इंदापूर राज्यमार्गावरती उसाचा ट्रॅक्टर-ट्रॉली व चारचाकी गाडी यांच्यामध्ये झालेल्या अपघातामध्ये ट्रॅक्टर चालकाचा जागीच मृत्यू झाल्याची घटना घडली.

अपघातामध्ये ट्रॅक्टर चालक बाळू दामू माळी (वय ४५,रा.कळशी ता.इंदापूर) याचा मृत्यू झाला. वालचंदनगर पोलिसांनी दिलेल्या माहितीनूसार आज बुधवार (ता.२७) रोजी पहाटे पाच च्या सुमारास ट्रॅक्टरचालक बाळू माळी हे उसाचा दोन ट्रेलर भरलेला ट्रॅक्टर व ट्राॅली घेवून जंक्शन बाजूकडून भवानीनगर बाजू कडे चालले होेते. बेलवाडी जवळच्या खारा ओढ्याच्या पुलावर याच वेळी बारामतीकडून इंदापूर बाजुकडे चाललेल्या चारचाकी गाडी व ट्रॅक्टर ट्राॅलीची जोरात धडक झाल्यामुळे अपघात झाला.

अपघातामध्ये ट्रॅक्टरचालक बाळू माळी यांचा अंगावरती उसाच्या ट्रेलर पडल्याने माळी यांचा जागीच मृत्यू झाला. अपघातामध्ये चारचाकी गाडीपेक्षा ट्रॅक्टर जास्त नुकसान झाले असून ट्रॅक्टरचे पाठीमागे चाक व पुढील चाके तुटली असून चक्काचूर झाला आहे. याप्रकरणी पोलिसांनी चारचाकी चालक तुषार तुकाराम आईनकर (रा.ठाणे) यांच्यावर गुन्हा दाखल केला असून विकास सदाशिव मत्रे (रा.पिंपरे) यांनी वालचंदनगर पोलिस ठाण्यात फिर्याद दिली आहे. तपास पोलिस हवालदार गुलाब पाटील तपास करीत आहेत.

अरुंद पुल ठरतोय धोकादायक...

बेलवाडी (ता.इंदापूर) जवळ बारामती-इंदापूर राज्यमार्गावर खाराओढ्यावरती अरुंद पुल आहे. अरुंद पुलावरुन दोन वाहने एकाचवेळी ये-जा करीत असताना अपघात होत आहेत. आत्तपर्यंत अरुंद पुलामुळे शेकडो अपघात झाले असून अनेकांना जीव गमवावा लागला आहे.