- सागर रोकडे

पाबळ : शिरूर तालुक्याच्या पश्चिम भागातील टाकळी हाजी, पाबळ, कवठे येमाई, सविंदणे, वडनेर खुर्द, फाकटे, चांडोह, निमगाव दुडे या परिसरातील गावांमध्ये रविवारी (ता.२६) दुपारी चार वाजण्याच्या सुमारास सोसाट्याचा वारा, विजांचा कडकडाट, मेघगर्जना, गारपिटीसह मुसळधार पाऊस बरसला.

अचानक आलेल्या अवकाळी गारपिटीच्या पावसाने शेती पिकांचे मोठ्या प्रमाणात नुकसान झाले. अनेक ठिकाणी कौलारू घरांची कौले फुटली. शेतात व अंगणात सर्वत्र गारांचा खच पाहायला मिळाला. वादळी वाऱ्याने झाडे उन्मळून पडली.

गारपिटीसह झालेल्या पावसाचा कांद्याची रोपे, मका, चारा पिके, गहू, ज्वारी, हरभरा, फ्लॉवर, कोबी या पिकांसह फळझाडांना मोठ्या प्रमाणात फटका बसला असून उभी पिके भुईसपाट झाली आहे.

कांदा लागवडीसाठी आलेली रोपे भुईसपाट झाल्यामुळे शेतकरी हतबल झाले आहे. सर्वाधिक फटका कोथिंबीर, मेथी, शेपू यांसारख्या भाजीपाला पिकांना बसला असून शेतात पाणी साचल्यामुळे भाजीपाला पिके शेतातच सडून जाणार असल्याने शेतकऱ्यांचा हातातोंडाशी आलेला घास अवकाळी पावसामुळे हिरावला आहे. शासनाने तत्काळ पंचनामे करून नुकसान भरपाई देण्याची मागणी परिसरातील नुकसानग्रस्त शेतकऱ्यांनी केली आहे.

"गारपिटीने पिकांचे मोठ्या प्रमाणात नुकसान झाले आहे. हजारो रूपयांचे बियाणे घेऊन कांदा लागवडीसाठी टाकलेले रोपे सडून जाणार आहे. शासनाने नुकसानीचे तत्काळ पंचनामे करून नुकसान भरपाई द्यावी."

- दत्तात्रय चौधरी शेतकरी

"गारपिटीमुळे नुकसान झालेल्या पिकांचे स्थळ पाहणी करून तत्काळ पंचनामे करण्याच्या सूचना मंडल अधिकारी, तलाठी, कृषी सहाय्यक यांना देण्यात आल्या आहेत. पंचनामे करुन नुकसान भरपाईसाठी अहवाल शासनाकडे पाठवण्यात येणार आहे."

- बाळासाहेब म्हस्के तहसीलदार, शिरूर