पुणे : कौटुंबिक वादामुळे विलग राहणाऱ्या पत्नीवर हॉटेल व्यावसायिक पतीनेच वेगवेगळ्या ठिकाणी नेऊन पिस्तुलाचा धाक दाखवित लैंगिक अत्याचार केला. तसेच पत्नीने पतीविरुद्ध दाखल केलेल्या तक्रारी मागे न घेतल्यास जीवे मारण्याचीही धमकी दिली. याप्रकरणी पतीविरुद्ध भारती विद्यापीठ पोलिस ठाण्यात गुन्हा दाखल करण्यात आला आहे. आकाश बलभीम लोंढे (रा. टेंभुर्णी, करमाळा) असे गुन्हा दाखल झालेल्या संशयित आरोपीचे नाव आहे. याप्रकरणी पत्नीने लोंढेविरुद्ध फिर्याद दाखल केली आहे.

- संत तुकाराम महाराज बीज सोहळा होणार की नाही; जिल्हाधिकाऱ्यांनी दिले आदेश​

पोलिसांनी दिलेल्या माहितीनुसार, फिर्यादी आणि आकाशचा काही वर्षांपूर्वी विवाह झाला होता. मात्र काही दिवसांनी त्यांच्यात वाद झाले. त्यामुळे पत्नी पतीपासून वेगळी राहात होती. या दरम्यान फिर्यादीने पतीविरुद्ध पोलिस ठाण्यात तक्रार दाखल केली होती. याबरोबरच इंदापूर येथील न्यायालयात त्यांच्यात घटस्फोट घेण्याबाबतचे प्रकरण प्रलंबित होते. दरम्यान, पतीने 8 जानेवारीला पत्नीला जबरदस्तीने गाडीमध्ये बसवून वडगाव बुद्रुक येथील एका हॉटेलमध्ये नेले. तेथे पिस्तुलाचा धाक दाखवित 'माझ्या आड येऊ नकोस, नाहीतर तुला संपवून टाकेन' अशी धमकी देत तिच्यावर जबरदस्तीने शारीरिक संबंध ठेवले.

- 'सकाळ' इम्पॅक्ट : पैलवान राहुल आवारेनं अवैध धंदा करणाऱ्यांना दाखवला वर्दीचा खाक्या​

त्यानंतर तिला टेंभुर्णी येथे नेऊन तिच्याशी पुन्हा जबरदस्तीने शारीरिक संबंध ठेवले. या घटनेमुळे प्रचंड धक्का बसल्याने फिर्यादीची मानसिक स्थिती बिघडली होती. तिच्यावर रुग्णालयात उपचार सुरू होते. उपचार घेतल्यानंतर तिने याप्रकरणी भारती विद्यापीठ पोलिस ठाण्यात फिर्याद दिली. वरिष्ठ पोलिस निरीक्षक जगन्नाथ कळसकर, पोलिस निरीक्षक संगीता यादव यांच्या मार्गदर्शनाखाली पोलिस उपनिरीक्षक गंगाधर घावटे या प्रकरणाचा तपास करीत आहेत.

- पुणे शहर आणि जिल्ह्यातील बातम्या वाचण्यासाठी येथे ► क्लिक करा

(Edited by: Ashish N. Kadam)