| पुणे - लखनौ, भोपाळ, कोची आणि विजयवाडा या चार शहरांमध्ये पेट्रोल, डिझेलच्या ज्वलनातून जितकी ऊर्जा वापरली जाते, तितक्‍या ऊर्जेचा वापर फक्त आपल्या एकट्या पुण्यात होतो. इंधनाची मागणी आणि वाहनातून होणारे प्रदूषण एकमेकांच्या हातात हात घालून शहरात वाढत असल्याचे यातून स्पष्ट झाले आहे. सर्व प्रकारच्या वाहनांमधील इंधनातील दररोज वापरण्यात येणाऱ्या ऊर्जेचा अभ्यास नवी दिल्ली येथील "सेंटर फॉर सायन्स अँड एन्व्हायर्न्मेंट'ने (सीएसई) केला आहे. त्याच्या विश्‍लेषणातून हा निष्कर्ष निघाला आहे. देशातील प्रमुख 14 शहरांमध्ये हा अभ्यास करण्यात आला. देशाची राजधानी दिल्ली, आर्थिक राजधानी मुंबई, तसेच, चेन्नई, बंगळूर आणि हैदराबाद या प्रत्येक शहरांची लोकसंख्या 50 लाख ते सव्वा कोटीच्या दरम्यान आहे. या मेगासिटींमध्ये वाहनांची संख्याही लक्षणीय आहे. त्यामुळे पर्यायाने तेथे इंधनातून निर्माण होणाऱ्या ऊर्जेचे प्रमाणही दर दिवसाला चार कोटी मेगा ज्यूल्सपेक्षा जास्त आहे. पुण्यासह कोची, जयपूर, अहमदाबाद, भोपाळ, विजयवाडा, चंडीगड या "मेट्रोसिटी'मध्ये लोकसंख्या 50 लाखांपेक्षा जास्त नाही. असे असूनही पुणे आणि अहमदाबाद या शहरांमध्ये पेट्रोल आणि डिझेलच्या ज्वलनातून निर्माण होणाऱ्या ऊर्जेचे प्रमाण दोन कोटी मेगा ज्यूल्सपेक्षा जास्त नोंदल्याचे निरीक्षण टिपले आहे. भोपाळ, विजयवाडा, लखनौ आणि कोची या शहरांमधील इंधनाच्या ज्वलनातून एकत्रित वापरली जाणारी ऊर्जा एकट्या पुण्यात दररोज वापरली जात आहे.
इंधनाच्या ऊर्जा वापरात पुणे सहावे
देशभरातील इंधनाची सर्वाधिक ऊर्जा वापरणाऱ्या 14 प्रमुख शहरांमध्ये पुण्याचा सहावा क्रमांक लागतो. दिल्ली, चेन्नई, बंगळूर, हैदराबाद, मुंबई आणि अहमदाबाद पाठोपाठ पुण्याचा क्रमांक आहे.
असा मोजला ऊर्जा वापर
दरदिवशी शहरात वापरल्या जाणाऱ्या इंधनातून निर्माण होणारी ऊर्जा मेगा ज्यूल्समध्ये मोजण्यात आली. त्या आधारावर हे विश्‍लेषण करण्यात आले आहे.
पुण्यातील इंधन ऊर्जेचा वापर (सर्व आकडे मेगा ज्यूल्समध्ये)
- वाहनातील इंधनातून वापरली जाणारी एकूण ऊर्जा - 23 कोटी
- दुचाकी - 12 कोटी
- मोटारी - 6 कोटी
- रिक्षा - 2 कोटी
- बस - 2 कोटी
- टॅक्‍सी - 1 कोटी |
